Presidenti ukrainas, Volodymyr Zelenskyy ka deklaruar se Kievi do të vazhdojë të nisë sulme ndaj rafinerive në Rusi në hakmarrje për sulmet ruse në infrastrukturën energjetike të Ukrainës.
“Operacioni kundër rafinerive ruse të naftës vazhdon, në hakmarrje për sulmet ruse në infrastrukturën energjetike të Ukrainës”, theksoi Zelenskyy në një postim në platformën X.
Ai theksoi se në Ukrainë centralet elektrike, rrjetet e energjisë, infrastruktura e ngrohjes, objektet e furnizimit me ujë dhe zinxhirët e furnizimit civil janë vazhdimisht nën sulm.
“Rusët nuk po e ndryshojnë natyrën e veprimeve të tyre agresive. Ata kanë refuzuar të ndërmarrin hapa për uljen e tensioneve që partnerët tanë kanë kërkuar dhe po planifikojnë sulme të mëtejshme”, shtoi ai.
Presidenti ukrainas tha gjithashtu se duhet të vazhdojë presioni mbi Moskën për t’u angazhuar në negociata kuptimplote që synojnë përfundimin e luftës.
