Këngëtarja shqiptare me famë ndërkombëtare, Bebe Rexha, ka shënuar një tjetër sukses në karrierën e saj muzikore, këtë herë me këngën “New Religion”, e cila ka arritur të renditet në mesin e 50 këngëve më të dëgjuara nga artistet femra në Spotify.
Projekti i saj është pozicionuar në vendin e 35-të të kësaj liste, një arritje që këngëtarja e ka ndarë me krenari me ndjekësit e saj në rrjetet sociale.
Ka qenë vetë Rexha ajo që e ka bërë të ditur lajmin përmes një postimi në platformën X, ku ka publikuar edhe renditjen përkatëse, duke shprehur emocionet për këtë sukses, të cilin e ka cilësuar si të veçantë, sidomos në këtë fazë të re të karrierës së saj.
“Fakti që ‘New Religion’ renditet në vendin e 35-të në listën Top 50 të Spotify-t është vërtet i jashtëzakonshëm”, ka shkruar këngëtarja. Kjo arritje merr rëndësi të veçantë edhe për faktin se Bebe Rexha ka nisur një kapitull të ri në karrierën e saj profesionale, pasi vendosi të shkëputej nga kompania diskografike Warner Records dhe të vazhdonte rrugëtimin si artiste e pavarur.
Ky vendim e ka përballur me sfida të reja në industrinë muzikore, ku artistët e pavarur shpesh kanë më pak mundësi financiare dhe mbështetje në promovimin e projekteve të tyre, krahasuar me ata që janë pjesë e kompanive të mëdha diskografike.
Një tjetër element që e bën këtë rezultat edhe më domethënës është fakti se “New Religion” është i vetmi projekt në listën përkatëse që i përket një artisteje të pavarur.
“Jam krenare që vendosa t’i besoja vetes dhe akoma më krenare për atë që po ndërtojmë. Faleminderit që jeni pjesë e këtij rrugëtimi. Nuk ka qenë një rrugë e lehtë, por ka qenë një rrugëtim i bukur”, është shprehur Rexha.
Për këngëtaren shqiptare, kjo renditje përfaqëson më shumë sesa një sukses në platformat muzikore. Ajo shënon një moment të rëndësishëm në kapitullin e ri të karrierës së saj, pas vendimit për të marrë vetë drejtimin e rrugëtimit artistik.
Në fund, Bebe Rexha ka falënderuar fansat për mbështetjen e vazhdueshme, duke vlerësuar rolin e tyre në këtë arritje dhe në rrugëtimin e saj si artiste e pavarur.
