Protestuesit e thirrur nga Partia Demokratike kanë nisur marshimin drejt Kryeministrisë, ku do të zhvillojnë protestën e paralajmëruar kundër qeverisë.
Mbështetësit e PD-së u grumbulluan fillimisht në selinë blu dhe më pas, të prirë nga deputetët Flamur Noka dhe Agron Gjekmarkaj, u zhvendosën drejt godinës së Kryeministrisë. Kjo është e shtuna e tretë radhazi që Partia Demokratike organizon protestë kundër qeverisë.
Ndërkohë, në orën 14:00 pritet të nisë edhe protesta e studentëve para Ministrisë së Arsimit, ku parashikohet të marrin pjesë të rinj nga qytete të ndryshme të vendit.
Studentët u kanë bërë thirrje qytetarëve, pedagogëve dhe të gjithë të interesuarve që t’u bashkohen në kundërshtimin e tyre, ndërsa vijojnë të refuzojnë ofertën e kryeministrit Edi Rama për dialog. Kreu i qeverisë ka publikuar gjithashtu një platformë online, përmes së cilës synon të komunikojë me studentët.
Një tjetër thirrje e të rinjve drejtuar qytetarëve lidhet me paralajmërimet për gjoba apo masa policore ndaj pjesëmarrësve në tubime, duke kërkuar që këto paralajmërime të mos i pengojnë ata të marrin pjesë në protesta.
Në mbështetje të studentëve janë shprehur edhe pedagogë, të cilët kanë bërë publike solidaritetin e tyre me kërkesat e të rinjve.