Ka shkuar në gjashtë numri i personave që humbën jetën dhe 15 të tjerë mbetën të plagosur pas një sulmi me armë zjarri në sheshin e tregut në Krakov të Polonisë pasditen e sotme.

Sipas një deklarate të policisë lokale në rrjetin social X, një person hyri me automjet në shesh rreth orës 15:00 dhe nisi të qëllonte “në mënyrë të rastësishme ndaj njerëzve nga makina e tij”.

Në rrjetet sociale qarkullojnë video ku duket momenti kur autori qëllon nga makina. Pamjet tregojnë një makinë të zezë që kalon nëpër zonën e tregut, ndërsa dëgjohen të shtëna me armë zjarri dhe njerëzit vrapojnë për t’u strehuar. 

Autoritetet bëjnë të ditur se autori i dyshuar ishte shtetas polak dhe veproi i vetëm. Ai u qëllua dhe mbeti i plagosur gjatë një shkëmbimi zjarri me policinë në afërsi të sheshit. Sipas policisë, personi ishte i veshur me rroba ushtarake dhe përdori një armë zjarri të gjatë, të tipit ushtarak.

 

 

 

 

View this post on Instagram

 

 

 

 

 

 

 

 

 

 

 

A post shared by Washington Mirror (@wsmirror)

Mes 15 të plagosurve janë edhe dy efektivë policie. Njëri prej tyre ndodhet në gjendje të rëndë, pasi u qëllua tri herë gjatë përplasjes me autorin e dyshuar. Ndërkohë, gjashtë viktimat janë katër gra dhe dy burra.

Ngjarja ndodhi në sheshin kryesor të Krakovit, një prej destinacioneve më të frekuentuara turistike në qytetin e dytë më të madh të Polonisë.

Sipas kompanisë së transportit publik të Krakovit, rreth orës 15:00, një drejtues tramvaji raportoi se automjeti i tij ishte qëlluar nga një person që ndodhej në një makinë në lëvizje, teksa kalonte pranë sheshit kryesor. Nga të shtënat u thye xhami i kabinës së drejtuesit të tramvajit.

Kryeministri polak, Donald Tusk, konfirmoi sulmin pas raportimeve të para në mediat lokale, të cilat iu referuan policisë dhe shërbimit zjarrfikës.

“Ministri i Brendshëm po më informon vazhdimisht për situatën në Krakov, pas të shtënave tragjike”, shkroi Tusk në X, duke shtuar se “policia po heton motivet dhe të gjitha rrethanat e sulmit”.

Më vonë gjatë mbrëmjes, zëdhënësi i qeverisë, Adam Szlapka, deklaroi në X se “ngjarja e sotme në Krakov ka tronditur të gjithë Poloninë”. Ai shtoi se kryeministri Donald Tusk është nisur drejt Krakovit.