Real Madridi ka shënuar fitoren e tetë radhazi në La Liga, duke mposhtur Valencian me rezultatin 0-3 në një ndeshje ku epërsia e madrilenëve doli në pah që në pjesën e parë. Fillimisht VAR-i shpëtoi Realin, pasi vendasit gjetën golin e avantazhit. Gjyqtari anuloi gjithçka për pozicion jashtë loje.
Pas këtij episodi, Reali mori kontrollin total të lojës dhe nuk e lëshoi më atë deri në fund të takimit. Kështu e ktheu ndeshjen në një demonstrim force përballë një Valencia të pafuqishme për t'u rikthyer në lojë. Ky sukses riktheu ekipin e Mourinho-s në garë me kohë të plotë për çdo trofe.
Në kuotën e pikëve, Reali kap provizorisht Barçën me 30 pikë. Fitore e pastër dhe bindëse për madrilenët, që vazhdojnë ecurinë e tyre të jashtëzakonshme në kampionatin spanjoll. Goli i parë erdhi në minutën e 28-të, kur Valverde zhbllokoi rezultatin me një predhë të vërtetë nga distanca, duke e çuar shifrat në 0-1 për Realin.
Tetë minuta më vonë, në të 36-tën, Arda Guler dyfishoi shifrat, duke goditur saktë brenda në zonë dhe duke tundur rrjetën e portierit vendas. Kështu, Reali shkoi në dhomat e zhveshjes me një avantazh të qartë prej dy golash, ndërsa Valencia nuk arriti të reagonte ndaj presionit të madrilenëve.
Në pjesën e dytë, nuk mund të mungonte në apel as Kylian Mbappe, i cili në minutën e 75-të u shërbye saktë nga Guler, kaloi edhe portierin dhe sigloi shifrat përfundimtare në 0-3. Pas këtij goli, Valencia mbeti edhe me 10 lojtarë pas një ndërhyrje të rëndë ndaj Mbappe-s, duke e mbyllur kështu çdo mundësi për t'u rikthyer në ndeshje.
Përveç rëndësisë në renditjen e La Liga, ky sukses ishte i rëndësishëm edhe për Mourinho-n në aspektin personal, pasi portugezi arrin kuotën e 77% të fitoreve në La Liga. I pyetur në konferencën për shtyp për këtë statistikë, Mourinho u shpreh: “Kjo tregon se duhet të fitojmë ndeshjen e radhës, sepse në këtë jetë, njerëzit i harrojnë shifrat e mira që mund të kenë njëfarë rëndësie.
Ne nuk jetojmë me shifrat e së kaluarës. Ne jetojmë në të tashmen dhe duhet ta fitojmë ndeshjen e radhës. Të jesh aty me këto shifra është krenari, por ndeshja e radhës është më e rëndësishmja”.
Fitorja e Realit ndaj Valencias vjen në një moment kyç të sezonit, duke e mbajtur ekipin në garë të plotë për trofe dhe duke i dhënë Mourinho-s një tjetër arritje personale në kampionatin spanjoll.