Pas veprimeve të presidentes, çështja e ndryshimit të Ligjit për Gjykatën Speciale është rikthyer në Kuvendin e Kosovës, ndërsa procesi vijon të jetë i paqartë.
Deputetët do të duhet të përcaktojnë hapat e ardhshëm, por çdo ndryshim i ligjit kërkon të paktën 61 vota, në bazë të nenit 80, paragrafi 4, të Kushtetutës së Kosovës.
Të lidhura
None found
Ende nuk dihet nëse në Kuvend do të sigurohet shumica e nevojshme dhe nëse propozimet do të arrijnë të miratohen.
Juristi Blerim Burjani, në një prononcim për “Bota sot”, ka deklaruar se Partia Demokratike e Kosovës mund të jetë duke analizuar mënyrën e harmonizimit të ndryshimeve të propozuara me kërkesat e Bashkimit Evropian.
Ai ka thënë se për këtë çështje mund të ketë bisedime që po zhvillohen larg vëmendjes publike, ndërsa sipas tij, mbetet për t’u parë nëse PDK-ja do të arrijë ta bindë BE-në.
“Për mendimin tim, PDK-ja po kalkulon dhe po shikon se si t’i përshtatë ndryshimet edhe me kërkesat e BE-së. Diçka në fshehtësi po zhvillohet. Tash, a arrijnë ta bindin BE-në, do ta shohim. Përndryshe, ligji si i tillë dhe i njëanshëm është i pamundur të zbatohet. Mirë është të aprovohet ligji, mirëpo askush nuk garanton se do të merret kush me të, më së paku BE-ja, nëse nuk arrihet një marrëveshje”, u shpreh Burjani.
Sipas juristit, miratimi i një ligji pa dakordimin e Bashkimit Evropian mund të krijojë vështirësi në zbatimin e tij dhe ta lërë atë vetëm si një akt të miratuar në letër.
“Pra, për ndryshimet duhet të pajtohet edhe BE-ja, nëse duan ta zbatojnë. Nëse jo, mund ta aprovojnë dhe ta lënë në sirtar të Kuvendit si suvenir të rrallë, që nuk e gjen ekspozitën e vet. Pra, ligj jo për ekspozitë, por për zbatim efektiv. Besoj se pa problem e miratojnë, por hallin e kanë te BE-ja”, përfundoi Burjani në prononcimin për “Bota sot”.
