Të paktën 64 persona kanë mbetur të plagosur si pasojë e një aksidenti hekurudhor të ndodhur në provincën Giza të Egjiptit, pasi një tren pasagjerësh u përplas me pjesën e pasme të një treni tjetër.

Sipas Ministrisë egjiptiane të Shëndetësisë, disa vagona dolën nga shinat pas përplasjes në linjën hekurudhore që lidh Kajron me Asuanin, një nga korridoret më të rëndësishme të transportit në vend.

Aksidenti ndodhi mes stacioneve Kafr Ammar dhe Al Raqa, ndërsa përplasja shkaktoi daljen nga shinat të disa vagonëve.

Menjëherë pas aksidentit, autoritetet angazhuan dhjetëra ambulanca për t’u ardhur në ndihmë të lënduarve dhe për t’i transportuar drejt spitaleve të zonës. Në vendngjarje u dërguan gjithashtu vinça dhe mjete të rënda për pastrimin e mbetjeve dhe rikthimin sa më shpejt të qarkullimit hekurudhor.

Fotografitë e publikuara nga mediat lokale tregojnë disa vagona të përmbysur ose të dalë nga shinat, ndërsa të tjerë kanë përfunduar në tokat bujqësore pranë linjës hekurudhore.

Aksidentet hekurudhore vazhdojnë të mbeten një problem i përsëritur në Egjipt, ku gjatë viteve të fundit janë regjistruar incidente të shumta me pasoja tragjike. Një nga ngjarjet më të rënda ndodhi në vitin 2002, kur një zjarr shpërtheu në një tren që udhëtonte nga Kajro drejt Luxorit, duke shkaktuar mbi 360 viktima.

Ekspertët dhe autoritetet shpesh kanë identifikuar gabimet njerëzore dhe defektet në sistemet e sinjalizimit si ndër shkaqet kryesore të aksidenteve.

Për këtë arsye, qeveria egjiptiane ka ndërmarrë prej vitesh reforma dhe investime për modernizimin e rrjetit hekurudhor dhe rritjen e sigurisë në transportin me tren.

/rtsh.al/