Policia e Vlorës ka arrestuar 34-vjeçarin Mario Meçanaj, pasi dyshohet se ka tentuar të përdorë armë zjarri gjatë një konflikti me një 41-vjeçar në zonën e Ujit të Ftohtë.
Ngjarja u regjistrua mbrëmjen e djeshme, rreth orës 20:50, në vendin e quajtur “Rrapi”, në lagjen “Uji i Ftohtë”. Gjatë patrullimit, shërbimet e Policisë konstatuan një konflikt për motive të dobëta mes Meçanajt dhe shtetasit E. H., 41 vjeç, banues në Tiranë.
Efektivët ndërhynë menjëherë për të parandaluar përshkallëzimin e situatës. Në momentin e ndërhyrjes, 34-vjeçari tentoi të largohej me vrap, por u kap dhe u neutralizua nga policia.
LEXO EDHE: Vlorë/Dyshohet se u helmuan nga ushqimi, fëmijë të kopshtit nr.10 në spital!
Nga veprimet e para hetimore dyshohet se gjatë konfliktit Meçanaj ka tentuar të përdorë një pistoletë, të cilën më pas e ka hedhur në rërë, në vendin ku u kap nga efektivët. Arma e zjarrit u gjet dhe u sekuestrua në cilësinë e provës materiale.
Gjatë kontrollit të automjetit të tij, policia gjeti dhe sekuestroi gjithashtu një përforcues metalik grushti.
Arrestimi u krye në kuadër të operacionit policor të koduar “Yacht”. Materialet procedurale i janë referuar Prokurorisë së Vlorës për veprime të mëtejshme.
LEXO EDHE: Vlora tronditet nga skandali në shkollë, 7 nxënëse denoncojnë mësuesin për ngacmim seksual
