Gjykata Kushtetuese ka rrëzuar kërkesën e 39 deputetëve demokratë, të cilët kërkuan shfuqizimin e dispozitave të dy dekreteve që lidhen me ministren virtuale “Diella”.
Deputetët e Partisë Demokratike iu drejtuan Kushtetueses duke kundërshtuar përfshirjen e Diellës në kabinetin qeveritar, me pretendimin se vendimmarrja për këtë çështje nuk ishte në përputhje me Kushtetutën.
Në kërkesën e tyre, 39 deputetët kërkuan shqyrtimin e ligjshmërisë së dispozitave të dekreteve presidenciale, të cilat lidhen me organizimin dhe përbërjen e Këshillit të Ministrave, duke vënë në diskutim edhe pozicionin e ministres virtuale.
Pas shqyrtimit të çështjes, Gjykata Kushtetuese ka vendosur të rrëzojë kërkesën e deputetëve, duke mos pranuar pretendimin për shfuqizimin e dispozitave të kundërshtuara.
