Një lamtumirë me zemrën plot, Ivan Balliu: Do ta mbaj gjithmonë Shqipërinë në zemër
Ivan Balliu ka vendosur t’i japë fund aventurës së tij me Kombëtaren shqiptare. Mbrojtësi ka bërë publik vendimin përmes një mesazhi emocionues në rrjetet sociale, ku ka falënderuar të gjithë ata që e shoqëruan gjatë nëntë viteve të tij me fanellën kuqezi.
Futbollisti, i cili ka qenë pjesë e rëndësishme e përfaqësueses në vitet e fundit, e ka cilësuar këtë periudhë si një nga kapitujt më domethënës të jetës dhe karrierës së tij.
Në mesazhin e lamtumirës, Balliu kujton emocionet, sakrificat, miqësitë dhe përjetimet e shumta, duke veçuar pjesëmarrjen në Kampionatin Europian “Gjermani 2024” si një nga momentet më të bukura dhe më krenare të karrierës.
Ai ka shprehur mirënjohjen për shokët e skuadrës, trajnerët, stafin teknik dhe veçanërisht tifozët shqiptarë, të cilët i kanë qëndruar pranë gjatë gjithë këtij rrugëtimi.
“Largohem me zemrën plot mirënjohje dhe krenari, duke e ditur se një pjesë e imja do t’i përkasë gjithmonë kësaj familjeje”, shkruan Balliu në mesazhin e tij.
Mbrojtësi e mbyll përshëndetjen me fjalët: “Nëntë vite në zemrën time. Një privilegj për gjithë jetën. Faleminderit, Shqipëri!”.
Kështu mbyllet një kapitull nëntëvjeçar për Ivan Balliun, i cili do ta mbajë gjithmonë të veçantë eksperiencën e tij me fanellën e Kombëtares shqiptare dhe pjesëmarrjen në EURO 2024.
