Katari ndërmjetëson bisedimet SHBA-Iran, planifikohet takim mes zv.presidentit amerikan Vance dhe zyrtarit iranian

Lajmi është bërë i ditur nga kreu i shërbimit turk të inteligjencës, Ibrahim Kalin, i cili deklaroi se takimi mund të ndihmojë në avancimin e negociatave mes Uashingtonit dhe Teheranit.

Gjatë një konference për shtyp të hënën, Kalin paralajmëroi se dështimi për të arritur një marrëveshje mund të çojë në një tjetër sulm amerikan kundër Iranit.

Megjithatë, agjencia iraniane e lajmeve Tasnim, e lidhur me Gardën Revolucionare, raportoi se një zyrtar i lartë i sigurisë në Teheran, i cili nuk u identifikua, ka mohuar që një takim i tillë të jetë planifikuar.

Sipas zyrtarit iranian, politika e Teheranit për negociatat nuk ka ndryshuar dhe nuk do të shqyrtohet asnjë mundësi për bisedime me palën amerikane pa ndërmarrjen paraprake të veprimeve konkrete nga Uashingtoni, në përputhje me shtatë kushtet e përcaktuara nga Irani.

“Politika dhe planet e Iranit në lidhje me negociatat nuk kanë ndryshuar dhe derisa pala amerikane të ndërmarrë veprime konkrete në kuadër të shtatë kushteve, nuk do të shqyrtohet asnjë plan për negociata me palën amerikane”, citohet të ketë deklaruar zyrtari.

Ndërkohë, në një zhvillim paralel diplomatik, kryeministri i Katarit, Sheikh Mohammed bin Abdulrahman Al Thani, është takuar në Shtëpinë e Bardhë me presidentin amerikan Donald Trump dhe zëvendëspresidentin JD Vance.

Kryeministri i Katarit kishte zhvilluar një vizitë në Teheran javën e kaluar, në kuadër të përpjekjeve diplomatike për uljen e tensioneve mes palëve.

Gjithashtu, një vizitë në Iran kishte zhvilluar edhe kryeministri i Irakut, me synimin, sipas raportimeve, për të kontribuar në përfundimin e luftës.

Pavarësisht sinjaleve për përpjekje të reja ndërmjetësimi, mbetet e paqartë nëse Uashingtoni dhe Teherani do të ulen në tryezën e negociatave, pasi pala iraniane ka mohuar deri më tani ekzistencën e një takimi të planifikuar.

Top Channel