Burime konfidenciale pranë presidentit të Skënderbeut konfirmojnë për Top Channel se gjithçka ka shkuar mirë, pas problemeve shëndetësore që shfaqi pas ndeshjes me Dinamon.
Presidenti i Skënderbeut, Ardjan Takaj, ka kaluar me sukses ndërhyrjen kirurgjikale në zemër. Burime konfidenciale pranë tij bëjnë me dije për Top Channel se operacioni ka përfunduar me sukses, duke sjellë lajme inkurajuese pas shqetësimit të krijuar për gjendjen e tij shëndetësore.
Takaj shfaqi probleme pas duelit që skuadra korçare zhvilloi të dielën e kaluar ndaj Dinamos dhe u transportua menjëherë në spital. Gjatë ndërhyrjes kirurgjikale, atij i janë vendosur dy stenda në arteriet koronare, për të trajtuar problemin kardiak.
Pas këtij zhvillimi pozitiv, pritet të mësohen më shumë detaje për ecurinë e rikuperimit të tij dhe gjendjen shëndetësore në ditët në vijim. Muajt e fundit kanë qenë të vështirë për presidentin e klubit korçar edhe në aspektin personal, pasi më 29 qershor humbi nënën e tij. Ndërkohë, Skënderbeu po kalon një sezon me sfida, por aktualisht renditet në vendin e pestë të kampionatit, me 14 pikë të grumbulluara.
Top Channel
