Një gjest i Felix Nmecha-s pas golit me Borussia Dortmundin ka shkaktuar reagime të forta te tifozët dhe ka detyruar Federatën Gjermane të ndërhyjë. Rudi Völler ka paralajmëruar një bisedë me futbollistin.
Jurgen Klopp përballet me një tjetër çështje delikate jashtë fushës, këtë herë me protagonist mesfushorin e Borussia Dortmundit, Felix Nmecha. Gjithçka nisi pas golit të shënuar ndaj Elversbergut, kur futbollisti festoi duke hequr një kurorë imagjinare nga koka dhe duke e vendosur në fushë. Gjesti lidhet me një fushatë të rrjetit fetar “Ballers in God”, pjesë e të cilit është edhe Nmecha.
Por ky veprim shkaktoi polemika, pasi hetime të mediave gjermane, përfshirë ARD, kanë evidentuar lidhje të këtij rrjeti me qëndrime kundër komunitetit LGBTQ+ dhe abortit. Shoqata zyrtare e tifozëve të Dortmundit dënoi publikisht festimin, duke theksuar se kritikat nuk kanë të bëjnë me të drejtën e lojtarit për të pasur bindje fetare, por me ideologjitë që bien ndesh me vlerat e një klubi gjithëpërfshirës.
Çështja ka mbërritur edhe në Kombëtaren gjermane. Drejtori teknik i Federatës, Rudi Völler, konfirmoi se do të bisedojë me Nmecha-n, i cili është grumbulluar për sfidat ndaj Serbisë dhe Holandës. “Ekziston liria e fesë dhe e besimit. Secili mund ta praktikojë besimin e tij. Megjithatë, do të flasim sërish me të, pasi kjo është kthyer në një çështje publike. Duhet ta kuptojmë plotësisht situatën”, deklaroi Völler. Edhe Borussia Dortmundi ka paralajmëruar një takim me futbollistin pas kthimit të tij nga grumbullimi me Kombëtaren.
Top Channel
