Skandali që përfshin drejtuesin ekzekutiv të Nvidia-s, Jensen Huang, dhe një grua që agjencitë amerikane të inteligjencës dyshojnë se është agjente kineze, po merr përmasa të reja.
Marrëdhënia jashtëmartesore e pranuar nga miliarderi 63-vjeçar është kthyer në një çështje të sigurisë kombëtare, ku në fokus janë dyshimet për rrjedhje informacionesh sekrete dhe trafikimin e procesorëve të avancuar drejt Kinës.
Gruaja, Alice Huang, e njohur edhe si Huang Le, ka qenë drejtuese në kompaninë Megaspeed, e cila ka blerë sasi të mëdha procesorësh Nvidia dhe është nën hetim për shmangien e mundshme të kufizimeve amerikane të eksportit drejt Kinës.
Ajo është njohur me Jensen Huang në fillim të vitit 2024, gjatë një aktiviteti të Nvidia-s në Kaliforni. Të dy janë fotografuar dhe filmuar së bashku në disa raste në Tajvan. Sipas New York Times, autoritetet amerikane dyshojnë se Alice Huang është rekrutuar nga Ministria Kineze e Sigurisë së Shtetit për të mbledhur informacione mbi teknologjinë amerikane të inteligjencës artificiale dhe për të ndikuar në vendimet e Nvidia-s për eksportin e procesorëve drejt Kinës.
Përpara se të angazhohej në biznes, ajo kishte punuar si gazetare për mediat kineze CCTV dhe Hunan TV.
Pas publikimit të skandalit, Jensen Huang pranoi tradhtinë bashkëshortore në një mesazh drejtuar punonjësve të kompanisë, ku kërkoi falje ndaj bashkëshortes dhe fëmijëve. Ndërkohë, Nvidia njoftoi nisjen e një hetimi të pavarur për të verifikuar nëse drejtuesi i saj ishte objekt i një operacioni spiunazhi dhe nëse ishin komprometuar informacione konfidenciale.
50 mijë procesorë të pagjurmueshëm
Një nga pistat kryesore të hetimit lidhet me kompaninë Megaspeed. Sipas Bloomberg, në vitin 2025 autoritetet amerikane i kërkuan Nvidia-s të auditonte transaksionet me këtë kompani, pasi dyshohej se procesorët po dërgoheshin në mënyrë të paligjshme drejt Kinës.
Auditimi evidentoi se Megaspeed kishte importuar rreth 50 mijë procesorë më shumë nga sa mund të justifikoheshin nga të dhënat e qendrave të saj të të dhënave. Ende nuk dihet se ku kanë përfunduar këta procesorë.
Ndërkohë, sipas Financial Times, Alice Huang u kishte prezantuar investitorëve mundësitë e kompanisë për të siguruar procesorë të avancuar të inteligjencës artificiale, duke përmendur edhe gjigantin kinez Alibaba si klient.
Megaspeed ka mohuar çdo shkelje, duke deklaruar se vepron në përputhje me rregullat amerikane të eksportit.
Dyshime për ndërhyrje në hetim
Sipas New York Times, Nvidia dyshohet se ka ushtruar presion ndaj Departamentit amerikan të Tregtisë për të ndalur hetimin mbi trafikimin e mundshëm të procesorëve përmes Megaspeed.
Ndërsa Bloomberg raporton se këshilltari ligjor i Nvidia-s, Tim Teter, kishte kontaktuar zyrtarë të Departamentit të Tregtisë për të mësuar nëse qeveria amerikane kishte pasur rol në ndalimin e Alice Huang nga autoritetet e Singaporit, të cilat e kishin thirrur për t’u marrë në pyetje dhe i kishin ndaluar largimin nga vendi.
Memorandumi sekret dhe kontaktet me Trump
Sipas New York Times, Donald Trump ishte informuar rreth një vit më parë se agjencitë amerikane të inteligjencës po monitoronin Alice Huang.
Në pranverën e vitit 2026, sekretari amerikan i Shtetit, Marco Rubio, thuhet se ka mbikëqyrur hartimin e një memorandumi sekret, ku përshkruheshin dyshimet se gruaja ishte rekrutuar nga inteligjenca kineze për t’iu afruar drejtuesit të Nvidia-s.
Çështja merr rëndësi edhe për shkak të marrëdhënieve të afërta të Jensen Huang me Donald Trump. Të dy janë takuar të paktën shtatë herë që nga fillimi i mandatit të dytë të presidentit amerikan, ndërsa diskutimet mes tyre kanë përfshirë edhe kufizimet për eksportin e procesorëve drejt Kinës.
Pas rikthimit të Trump në Shtëpinë e Bardhë, SHBA lehtësoi disa prej kufizimeve të vendosura më herët. Në gusht 2025 u lejua eksporti i disa procesorëve Nvidia drejt Kinës, kundrejt një përqindjeje prej 15% të të ardhurave për qeverinë amerikane. Në dhjetor, u miratua edhe eksporti i procesorëve më të fuqishëm H200, me një përqindje prej 25%.
Dyshimi kryesor i autoriteteve është se, nëse Alice Huang ka punuar për inteligjencën kineze, marrëdhënia me drejtuesin e Nvidia-s mund t’i ketë siguruar akses në informacione konfidenciale mbi negociatat me Trump dhe strategjinë amerikane për teknologjinë e inteligjencës artificiale.
Megjithatë, deri më tani nuk ka prova që informacione të tilla kanë përfunduar te autoritetet kineze.