Fenomeni klimatik El Niño mund të përkeqësojë krizën globale të urisë, duke rrezikuar të çojë edhe 49 milionë njerëz të tjerë drejt pasigurisë akute ushqimore deri në fund të vitit 2027. Paralajmërimi vjen nga Programi Botëror i Ushqimit (WFP) i Kombeve të Bashkuara, i cili vlerëson se numri i përgjithshëm i personave që përballen me këtë situatë mund të arrijë në 274 milionë.

Sipas raportit, ekziston një mundësi prej 81% që të zhvillohet një episod shumë i fuqishëm El Niño, i cili mund të jetë më i forti që nga viti 1950. Rritja e temperaturave të sipërfaqes së oqeanit Paqësor pritet të ndikojë në modelet globale të motit, duke sjellë thatësira, reshje të çrregullta dhe përmbytje në rajone të ndryshme.

Amerika Qendrore dhe Afrika Jugore pritet të jenë ndër zonat më të prekura, ku numri i njerëzve në pasiguri ushqimore mund të rritet përkatësisht me 83% dhe afro 75%. Ndërkohë, më shumë se 12 milionë persona shtesë mund të preken në secilin prej rajoneve të Afrikës Jugore, Amerikës së Jugut dhe Karaibeve.

“Janë ngjarje që në të kaluarën kanë shkaktuar uri në shkallë të gjerë”, deklaroi Jean-Martin Bauer, drejtor i Shërbimit të Analizës së Sigurisë Ushqimore dhe Ushqyerjes në WFP.

Ai paralajmëroi gjithashtu se konflikti në Lindjen e Mesme dhe dëmet e mundshme në prodhimin bujqësor mund të ushtrojnë presion të mëtejshëm mbi çmimet e ushqimeve, duke e bërë më të vështirë furnizimin për familjet më të cenueshme.

WFP thekson se parashikimet mbeten të pasigurta dhe se ndikimi i El Niño-s do të ndryshojë nga një rajon në tjetrin. Megjithatë, agjencia u bën thirrje qeverive dhe organizatave humanitare të marrin masa paraprake për të parandaluar përkeqësimin e krizës ushqimore.

“Në kuadër të COP31, kërkojmë financimin e veprimeve parandaluese, përpara se parashikimet të shndërrohen në emergjenca”, deklaroi Stefano Piziali, drejtor i përgjithshëm i CESVI.

Piziali nënvizoi  gjithashtu se komuniteti ndërkombëtar duhet të kalojë nga premtimet te veprimet konkrete, duke siguruar financimin në kohë të masave parandaluese.

“Nuk nevojiten premtime të reja. Tani është thelbësore që fondet të mbërrijnë përpara emergjencave. Të ndihmosh një familje përpara se të humbasë të korrat do të thotë të shmangësh që anëtarët e saj t’i shtohen 49 milionë njerëzve të rrezikuar nga uria: në këtë mënyrë mbrohen më shumë jetë dhe reduktohen dëmet”, përfundoi ai.