Shembet ura hekurudhore në Rusi, dalin nga shinat vagonët e një treni mallrash! Bllokohet qarkullimi

Një urë hekurudhore u shemb mëngjesin e së martës, në rajonin e Arhangelskut të Rusisë, duke shkaktuar daljen nga shinat të disa vagonëve të një treni mallrash dhe ndërprerjen e qarkullimit të trenave në këtë zonë.

Ngjarja ndodhi rreth orës 05:10 sipas orës lokale, kur një pjesë e urës mbi lumin Vilend u shemb, në segmentin hekurudhor midis Cheriomukha dhe Vilend, sipas autoriteteve lokale.

Siç njoftoi guvernatori i rajonit të Arhangelskut, Aleksandr Tsibulski, si pasojë e shembjes, disa vagonë të një treni mallrash dolën nga shinat. Sipas informacioneve paraprake, nuk raportohet për persona të lënduar.

Qarkullimi hekurudhor në këtë segment u ndërpre, duke shkaktuar vonesa për të paktën tetë trena pasagjerësh. Në vendngjarje janë dërguar ekipe të specializuara dhe trena të posaçëm për riparimin e linjës, me qëllim përballimin e pasojave të shembjes.

Ndërkohë, autoritetet lokale po shqyrtojnë mundësi alternative për transportimin e pasagjerëve të bllokuar për shkak të ndërprerjes së lëvizjes së trenave, përfshirë edhe përdorimin e autobusëve.

Shërbimet përkatëse kanë nisur një hetim për të përcaktuar shkaqet e sakta të shembjes, pasi deri më tani nuk është bërë e ditur nëse incidenti ka ardhur si pasojë e një problemi në ndërtim, defektit të infrastrukturës apo ndonjë shkaku tjetër.