Mohamed Salah i është bashkuar grumbullimit të kombëtares së Egjiptit, duke bërë paraqitjen e parë në kampin e ri të përfaqësueses nën drejtimin e trajnerit Ali Maher. Ylli i futbollit egjiptian dhe kapiteni i “Faraonëve” ka mbërritur këtë të martë në bazën stërvitore të ekipit, në kuadër të përgatitjeve për dy ndeshjet e ardhshme ndaj Malavit.
Salah u prit nga trajneri i ri, me të cilin shkëmbeu përshëndetje dhe biseda miqësore. Në fotografitë e publikuara nga Federata Egjiptiane e Futbollit, sulmuesi shfaqet në një atmosferë pozitive, duke komunikuar edhe me pjesëtarët e stafit teknik.
Futbollisti pritet të marrë pjesë në stërvitjen e sotme, ndërsa Egjipti po përgatitet për dy përballjet ndaj Malavit, të planifikuara më 13 dhe 17 nëntor, të vlefshme për kualifikueset e Kupës së Kombeve të Afrikës 2027.
Ky grumbullim shënon fillimin e bashkëpunimit mes Salah dhe trajnerit Ali Maher, i cili mori drejtimin e kombëtares pas largimit të Hossam Hassan të shtunën e kaluar.
Kujtojmë se Salah ishte larguar nga grumbullimi i mëparshëm pas ndeshjes me Angolën, ku u aktivizua për rreth një orë. Federata kishte shpjeguar se vendimi ishte marrë për t’i dhënë pushim lojtarit, për shkak të kushteve të veçanta të fushës artificiale ku do të luhej sfida ndaj Sudanit të Jugut.
