Karabinierët e Stacionit të Tor San Lorenzo në Itali arrestuan dy shtetas shqiptarë, 26 dhe 20 vjeç, nën akuzën e mbajtjes së lëndëve narkotike me qëllim trafikimin. Operacionet u zhvilluan në kuadër të kontrolleve kundër trafikut të drogës dhe përfunduan me sekuestrimin e kokainës, crack, hashashit dhe marijuanës gjatë dy ndërhyrjeve brenda 24 orëve.
Ndërhyrja e parë u zhvillua në bulevardin San Lorenzo, ku karabinierët vunë re 26-vjeçarin duke dorëzuar një paketë të vogël përmes portës së një banese. Me të parë policinë, i riu u largua me automjetin e tij, duke shkaktuar një ndjekje që përfundoi në qytetin e Aprilias, në rrugën Adda, ku ai u ndalua. Gjatë kontrollit të automjetit, karabinierët sekuestruan 12 gramë kokainë të ndarë në 26 doza, 2 gramë crack në 4 paketime dhe 3 gramë hashash të ndarë në 4 paketime.
Operacioni i dytë u zhvillua ditën pasuese, kur karabinierët ndaluan për kontroll një tjetër shtetas shqiptar, 20 vjeç, gjatë drejtimit të automjetit. Gjatë kontrollit të makinës, efektivët gjetën të fshehura në vende të ndryshme 10 gramë kokainë të ndarë në 27 doza, 3 gramë crack në 5 doza, 2 gramë hashash dhe 1 gram marijuanë.
Të dy të arrestuarit, me banim në Aprilia dhe moshë 26 dhe 20 vjeç, akuzohen për mbajtje të lëndëve narkotike me qëllim shpërndarjen. Aktualisht ata ndodhen në dispozicion të autoriteteve gjyqësore italiane.