Ish-futbollisti i Celta Vigos dhe Valencias, Santi Mina, duhet të përgatitet për të vuajtur dënimin me katër vite burg për abuzim seksual. Gjykata e Almerías i ka dhënë mbrojtjes së tij një afat prej 10 ditësh për të paraqitur argumentet lidhur me ekzekutimin e dënimit, i cili është konfirmuar përfundimisht nga Gjykata e Lartë spanjolle në shtator.

Meqenëse dënimi është më i gjatë se dy vite burg, pezullimi i zakonshëm i vuajtjes së tij nuk mund të aplikohet. Pas përfundimit të këtij afati procedural, pritet të lëshohet urdhri që do t’i mundësojë futbollistit të paraqitet vullnetarisht në institucionin që do të zgjedhë.

Vendimi i gjykatës përfshin gjithashtu detyrimin që Mina të respektojë ndalimin për t’iu afruar më pak se 500 metra viktimës dhe për të komunikuar me të në çfarëdo mënyre, për një periudhë prej 12 vitesh. Shkelja e këtyre kufizimeve mund të përbëjë një vepër tjetër penale. Përveç kësaj, ai është dënuar të paguajë 25 mijë euro dëmshpërblim për dëmin moral.

Ngjarja për të cilën është dënuar futbollisti ka ndodhur në orët e para të 16 qershorit 2017, në një furgon të parkuar pranë një diskoteke në Mojácar, në provincën e Almerías.

Në shtator, Gjykata e Lartë hodhi poshtë të gjitha 29 argumentet e paraqitura nga mbrojtja në rekurs dhe la në fuqi dënimin me katër vite burg. Sipas vendimit, veprimet e Mina-s përbënin abuzim seksual pa pëlqimin e viktimës.

Ndërkohë, gjykata ka shpallur të formës së prerë pafajësinë e futbollistit tjetër, David Goldar, i cili ishte përfshirë gjithashtu në procesin gjyqësor.