Ekspozitë për Luftën e Parë Botërore, prezantohen në Korçë fotografitë e realizuara nga një toger francez
Fotografi të realizuara më shumë se një shekull më parë, në vitet e Luftës së Parë Botërore, sjellin dëshmi të rralla të jetës në juglindje të Shqipërisë. Ekspozita e çelur në Korçë, në prag të përkujtimit të 11 Nëntorit, ditës së armëpushimit që shënoi fundin e Luftës së Parë Botërore, prezanton fotografi të realizuara nga togeri francez Silhol, i cili shërbeu në Shqipëri në vitin 1917.
Historiani francez Gregor Marchal, gjatë prezantimit të fotografive, rrëfeu itinerarin e oficerit Silhol në vendin tonë.
“Ai mbërriti në Shqipëri në vitin 1917 dhe qëndroi në Korçë. Kishte në dispozicion një kompani transporti, përmes së cilës transportonte municione dhe furnizime në të gjithë territorin e Korçës, deri në zonat malore. Udhëtoi deri në Gramsh, Pulçar, Pogradec, Maliq, Dars, në malet e Gramshit, madje edhe në Tomorr. Këto fotografi janë të jashtëzakonshme, pasi nuk dokumentojnë vetëm ushtarakët, por edhe peizazhet dhe popullsinë. Ai ishte veçanërisht i interesuar për njerëzit dhe shqiptarët. Ishte një njeri shumë altruist, që kujdesej jo vetëm për ushtarët e tij, por edhe për kafshët dhe popullsinë vendase”, tha Gregor Marchal, historian francez.
E pranishme në çeljen e ekspozitës ishte edhe ambasadorja franceze në Shqipëri, e cila e cilësoi këtë aktivitet si një moment të rëndësishëm për kujtesën historike dhe marrëdhëniet mes dy vendeve.
“Jemi në prag të ceremonisë së 11 Nëntorit, ditës së armëpushimit të Luftës së Parë Botërore, e cila është simbol i paqes. Jam e lumtur që çelim këtë ekspozitë me fotografi nga Lufta e Parë Botërore. Dua të falënderoj Amanda Cicin, Ministrinë Franceze të Forcave të Armatosura dhe historianin Gregor Marchal”, u shpreh Catherine Suard, ambasadore e Francës në Shqipëri
Përmes këtyre fotografive, Korça rikthen në vëmendje një prej periudhave më të rëndësishme të historisë së saj, kur prania franceze la gjurmë jo vetëm në zhvillimet ushtarake dhe politike, por edhe në marrëdhëniet me popullsinë vendase.
