Nën drejtimin e kryetarit Bledar Çuçi, Komisioni për Çështjet e Brendshme dhe të Mbrojtjes zhvilloi tre seanca dëgjimore në lidhje me projektbuxhetin e vitit 2027 me përfaqësuesit e Gardës së Republikës, Agjencisë së Inteligjencës dhe Sigurisë së Mbrojtjes (AISM), si dhe Agjencisë së Mbikëqyrjes në Sistemin e Ekzekutimit të Vendimeve Penale (AMSEVP).

Në pjesën e parë të mbledhjes, Komandanti i Gardës së Republikës, Simon Zareci, bëri argumentimin e kërkesave finansiare të institucionit që drejton, duke vënë theksin te rritja e kapaciteteve operacionale.

“Buxheti i institucionit për vitin 2027 është 2,84 miliardë lekë ose rritje 2,6% krahasuar me vitin 2026,” tha Zareci, duke sqaruar se kjo mbështetje financiar “garanton mbulimin e shpenzimeve të personelit, pagat, orët shtesë dhe veshje të personelit, pajisjen e sistemit të teknologjisë, blerje dhe materiale të tjera të nevojshme për mirëfunksionimin e institucionit.”

Gjatë diskutimit, relatori i çështjes, Agron Malaj, vlerësoi rritjen pozitive por ngriti shqetësimin për trajtimin e pagave në krahasim me sektorët e tjerë të sigurisë.

“Megjithëse rritja pozitive gati 3% e buxhetit të 2027 për Gardën e Republikës, për vlerësimin e mjaftueshmërisë së financimit duhet marrë në konsideratë nevojat për modernizimin e kapaciteteve operacionale dhe përgjegjësitë e shtuara që priten gjatë vitit 2027,” nënvizoi relatori Malaj, duke vënë theksin veçanërisht te “mosparashikimi për rritjen e pagave të punonjësve të Gardës sikundër i është parashikuar rritje punonjësve të Policisë.”

Seanca dëgjimore vijoi me Agjencinë e Inteligjencës dhe Sigurisë së Mbrojtjes (AISM), ku Drejtori i agjencisë, Kolonel Xhevahir Gërxhaliu, paraqiti projeksionet buxhetore dhe prioritetet e institucionit.

“Prioriteti ynë për vitin 2027 është rritja e efektivitetit dhe kapacitetit të institucionit, modernizimi i metodave dhe instrumenteve të punës, forcimi i bashkëpunimit ndërinstitucional dhe thellimi i bashkëpunimit me strukturat homologe aleate,” u shpreh Kol. Gërxhaliu. Ai sqaroi se rritja prej 17% e buxhetit bazë “do të shkojë kryesisht për trajtimin e personelit ku përfshihet dhe trajtimi për kushte të veçanta të punës, projekte për modernizimin”, si dhe realizimin e dy projekteve ambicioze investuese.

Në seancën e tretë, Drejtori i Përgjithshëm i AMSEVP-së, Eduart Merkaj, arsyetoi kërkesën për zgjerimin e infrastrukturës dhe bazës buxhetore të agjencisë, nisur nga rritja e përgjegjësive ligjore.

“Kjo agjenci ushtron mbikëqyrjen duke vlerësuar dhe propozuar që struktura e re të përbëhet nga 131 punonjës nga 70 që ka aktualisht, strukturë kjo e cila do të jetë e organizuar në nivel qendror dhe vendor territorial,” deklaroi Merkaj, duke plotësuar se “zgjerimi i strukturës organizative të agjencisë shoqërohet edhe me shtim të veprimtarisë dhe për rrjedhojë edhe planifikim të buxhetit të institucionit në varësi të kësaj strukture të re.”

/rtsh.al/