Mes luleve në oborrin e shtëpisë së tij, kompozitori Halit Shpuza na mirëpret për të folur për jetën dhe krijimtarinë e tij, me një kontribut të gjatë në arsim.

Ai ka një pasion të veçantë për muzikën. Halit Shpuza veçon pjesëmarrjet në Festivalin e Këngës “Lule Bore”.

“I them Rozafës: ‘Më bëj një tekst për nënën’. Nuk më tha asgjë. E pashë që s’i pëlqeu ose ishte diçka emocionale, sepse i kishte vdekur nëna. Kur më tha se i pëlqente më shumë ky tekst për gjyshen, në këtë rast vrau dy zogj me një gur. Bëri një tekst për gjyshen e vet edhe për nënën time.”

Kompozitori shkodran ka edhe kritika për mënyrën se si vlerësohet krijimtaria e sotme muzikore.

“Po këtu duhet të shqyrtohet i gjithë ky aktivitet. As para festivalit, as pas festivalit nuk bëhet asnjë diskutim. Nuk e kuptoj se si priten këto zhvillime të këngës, të muzikës në të vërtetë, të rritjes së saj në kërkesë, pa i diskutuar. Çfarë pati të mirë ky festival, çfarë pati të keqe? Unë jam 85 vjeç, mor burrë, dhe kam dëshirë të konsultohem, të dëgjoj mendimin e tjetrit.”

Pas shumë vitesh në arsim dhe muzikë, Halit Shpuza vijon të krijojë, duke mbajtur gjallë pasionin për këngët shkodrane.

/rtsh.al/