Komuna e Prizrenit ka njoftuar se po vazhdojnë punimet për ndërtimin e një rrethrrotullimi të ri në rrugën e Nashecit, projekt që synon lehtësimin e qarkullimit dhe evitimin e kolonave në këtë zonë.
Sipas njoftimit të komunës, drejtori i Shërbimeve Publike, Islam Ukimeri, së bashku me stafin e tij, ka përcjellë nga afër ecurinë e punimeve në këtë projekt.
Përveç ndërtimit të rrethrrotullimit, projekti parasheh edhe zgjerimin e rrugës dhe ndërtimin e një ishulli trekëndësh.
Komuna ka bërë të ditur se realizimi i këtij projekti pritet të lehtësojë qarkullimin dhe qasjen në trafik, veçanërisht për banorët e lagjes “Jeta e Re” dhe të fshatit Nashec.
Ndërkaq, nga Komuna e Prizrenit është theksuar se investimet në infrastrukturën rrugore do të vazhdojnë me qëllim të krijimit të kushteve më të mira për qytetarët. /Telegrafi/
