Ministri i Drejtësisë, Toni Gogu u takua sot në Romë me homologun e tij italian, Carlo Nordio, ku në fokus të bisedimeve ishte forcimi i bashkëpunimit mes Shqipërisë dhe Italisë në fushën e drejtësisë.
Përmes një postimi në Facebook, Gogu bënë të ditur se gjatë takimit ka falënderuar homologun italian “për mbështetjen e vazhdueshme të Italisë, partnerit tonë strategjik në rrugën drejt integrimit evropian, dhe për ndihmën në përgatitjen e ndryshimeve në Kodin e Procedurës Penale dhe paketave të tjera legjislative”.
“Me Ministrin Nordio ndamë angazhimin për të konsoliduar më tej marrëdhëniet mes dy vendeve dhe për të zgjeruar bashkëpunimin në fusha të tjera të drejtësisë”, theksoi Gogu.
Më herët gjatë ditës së sotme Gogu u takua me kryetarin e Komisionit të Punëve të Jashtme dhe Mbrojtjes, Maurizio Gasparri, bashkëpresidentin e Gjykatës së Kasacionit, Stefano Mogini si dhe kryetarin e Komisionit të Drejtësisë të Dhomës së Deputetëve, Ciro Maschio.
