Maran përgatit ndryshimet për Finlandën, ja si pritet të luajnë kuqezinjtë

Shqipëria po vijon përgatitjet për përballjen e rëndësishme ndaj Finlandës në Ligën e Kombeve, me synimin për të marrë një rezultat pozitiv dhe për t’u rikthyer te fitorja. Në prag të kësaj sfide, trajneri Rolando Maran duket se ka përcaktuar në masë të madhe lojtarët që pritet të zbresin në fushë nga minuta e parë.

Në portë, Etrit Berisha shihet si zgjedhja e parë, ndërsa mbrojtja pritet të formohet nga Berat Gjimshiti, Ardian Ismajli, Elseid Hysaj dhe Mario Mitaj.

Në repartin e mesfushës, Maran pritet t’u besojë Ylber Ramadanit, Kristjan Asllanit dhe Qazim Laçit. Kjo treshe do të ketë një rol të rëndësishëm në organizimin e lojës dhe ndërtimin e aksioneve sulmuese.

Ndërkohë, në fazën ofensive, tre emrat që projektohen si titullarë janë Ernest Muçi, Pilo dhe Rey Manaj. Ata pritet të përbëjnë vijën e parë të sulmit, me detyrën për të vënë në vështirësi mbrojtjen finlandeze dhe për të shfrytëzuar rastet për shënim.

Formacioni i mundshëm tregon se tekniku italian synon të ruajë një ekuilibër mes eksperiencës dhe potencialit ofensiv, në një takim që mund të jetë vendimtar për objektivat e Shqipërisë në Grupin C1.