Qeveria ka nisur diskutimet me grupet e interesit për hartimin e listës së produkteve ushqimore që do të përfitojnë nga TVSH-ja e reduktuar 6%, por vështirësitë me identifikimin dhe klasifikimin e mijëra artikujve në supermarketet krijojnë paqartësi dhe shqetësim te tregtarët. Ministria e Ekonomisë zhvilloi një takim me përfaqësues të rrjeteve të supermarketeve për përcaktimin e produktet që do të përfshihen në skemë. Në projektligjin e paketës fiskale propozohet që produktet ushqimore bazë — përfshirë bukën dhe miellin, qumështin dhe kosin natyral, vezët, orizin, makaronat, vajin ushqimor, mishin e pulës, mishin e viçit/derrit, peshkun bazë, frutat dhe perimet e freskëta, bishtajoret, sheqerin dhe ushqimet bazë për foshnja — të trajtohen me shkallë të reduktuar TVSH-je 6%. Lista e detajuar me kodet përkatëse të Nomenklaturës së Kombinuar do të përcaktohet me vendim të Këshillit të Ministrave, ndërsa shkalla e reduktuar aplikohet njësoj brenda vendit dhe në import.
Qeveria synon krijimin e një katalogu të unifikuar me rreth 10,000 produkte ushqimore që do të përfitojnë nga ulja. Produktet do të identifikohen përmes barkodeve dhe të klasifikohen në sistemet e supermarketeve, ndërsa pritet koordinimi i të dhënave mes rrjeteve dhe institucioneve shtetërore për zbatimin e skemës. Përfaqësuesit e supermarketeve vlerësojnë se procesi është i vështirë për shkak të numrit të madh të artikujve dhe kodeve të ndryshme; sipas tyre, një supermarket mund të ketë deri në 50,000 kode për produkte ushqimore, dhe për një markë mielli mund të ekzistojnë deri në 12 kode të ndryshme — e njëjta situatë për orizin dhe makaronat.
Problemet kryesore përfshijnë paqartësi mbi artikujt që përfitojnë konkretisht nga ulja (p.sh. mishi i freskët i pulës vs. filetoja e pulës) dhe kategoritë e produkteve të bulmetit (kosi me fruta, djathi i dhisë, kaçkavalli). Mbetet sfidë koordinimi i sistemeve të shkëmbimit të të dhënave. Sektori paralajmëron se pa listë të qartë dhe sistem të unifikuar raportimi zbatimi rrezikon konfuzion dhe vështirësi administrative. Ndryshimet propozohet të hyjnë në fuqi më 1 janar 2027.
Kontabilistë dhe ekspertë paralajmërojnë se ulja e çmimeve mund të mos reflektohet plotësisht, ndërsa rritja e TVSH-së standarde në 21% pritet të rrisë çmimet e produkteve të tjera si detergjentët dhe shampo. Aleanca e Profesionistëve të Lira vlerëson se përfitimi për familjet varet nga reflektimi i uljes në çmimet përfundimtare; sipas saj, për një çmim neto të pandryshuar rritja e TVSH-së standarde nga 20% në 21% rrit çmimin bruto rreth 0.83%, ndërsa ulja për ushqimet mund ta ulë deri në 11.7% nëse përcillet plotësisht te konsumatori.