Presidenti kinez: Ribashkimi i Tajvanit duhet të ndodhë, rrjedha e historisë nuk mund të ndalet

Presidenti kinez Xi Jinping tha të enjten se rrjedha e historisë nuk mund të ndalet, ndërsa kërkoi “ribashkim” të plotë të Tajvanit. Ai u zotua ta bënte ribashkimin në mënyrë paqësore, pa përmendur përdorimin e forcës.

Kina e sheh Tajvanin e qeverisur në mënyrë demokratike si territorin e vet, pavarësisht refuzimit të fortë të këtij pretendimi nga Taipei, dhe ka ofruar vazhdimisht një model autonomie “një vend, dy sisteme” që nuk mbështetet nga asnjë parti e madhe politike tajvaneze.

“Zgjidhja e çështjes së Tajvanit është një mision historik i palëkundur i Partisë Komuniste të Kinës,” tha Xi në një fjalim në Sallën e Madhe të Popullit të Pekinit.

“Rrjedha e historisë nuk mund të ndalet. Ribashkimi i plotë i atdheut duhet të realizohet dhe me siguri do të realizohet”, shtoi ai.

Komentet e Xi-së erdhën në një fjalim me rastin e 160-vjetorit të lindjes së heroit revolucionar Sun Yat-sen, i cili ndihmoi në udhëheqjen e një revolte të vitit 1911 që i dha fund shekujve të sundimit nga perandorët dhe perandoreshat dhe solli Republikën e Kinës.

Edhe pse Xi nuk e përmendi përdorimin e forcës, të cilën Kina nuk e ka hequr kurrë dorë për Tajvanin, ushtria e saj vepron rreth ishullit çdo ditë dhe po e zgjeron shtrirjen e saj më tej në Paqësor.