Shkollat italiane i kthehen mësimit të zakonshëm pas një dite pasigurie të shkaktuar nga mesazhet që paralajmëronin për bomba.
Ministri i Arsimit dhe Meritës, Giuseppe Valditara, tha në një intervistë televizive për Rete4 se nuk ka rrezik konkret. Ai siguroi se të gjitha shkollat do të qëndrojnë të hapura dhe se nxënësit mund të shkojnë në mësim pa shqetësim.
Të lidhura
None found
Verifikimet paraprake, sipas Valditarës, tregojnë se mesazhe kërcënuese kanë mbërritur në adresat elektronike të mbi 6 mijë shkollave italiane. Shpërndarja e tyre në një shkallë kaq të gjerë ka ngritur dyshime për një veprim të organizuar. Ministri tha se ende nuk dihet nëse autorët synojnë të përhapin panik apo janë individë që kanë vepruar pa një strategji të përcaktuar.
Institucionet po e trajtojnë situatën me seriozitet. Forcat e rendit dhe strukturat përkatëse kanë nisur hetimet për të identifikuar personat që dërguan mesazhet.
Zëvendëskryeministri italian Matteo Salvini hodhi poshtë pretendimet për një përfshirje të mundshme ruse, duke thënë se nuk ka asnjë provë që i lidh rusët me këto kërcënime. Ai u shpreh se shërbimet e inteligjencës dhe Policia Postare po punojnë për të zbuluar autorët dhe kërkoi prova konkrete përpara se të bëhen akuza.
