Nga siguria që “do të mbahet”, te “nëse do të ketë” në 2028…

Kryeministri Edi Rama ka zbutur ndjeshëm sigurinë me të cilën më parë fliste për organizimin e Samitit të ardhshëm të NATO-s në Tiranë. Nga deklaratat kategorike se Shqipëria do të ishte vendi pritës i takimit të liderëve të Aleancës, kreu i qeverisë tashmë pranon se ende nuk ka një dakordësi për kohën e zhvillimit të tij.

Gjatë qëndrimit në Dublin, ku mori pjesë në takimin e Komunitetit Politik Evropian, Rama u shpreh se samiti nuk pritet të zhvillohet në vitin 2027. Ndërkohë, edhe mundësia që Tirana të presë këtë aktivitet në vitin 2028 është e kushtëzuar nga zhvillimi i vetë samitit dhe vendimmarrja përkatëse brenda NATO-s.

“Shqipëria është planifikuar si pritësja e radhës e Samitit të NATO-s. Çështja është që s’ka ende një qëndrim të përbashkët se kur Samiti do të mbahet. Me siguri, jo në 2027. Dhe në 2028, nëse do të ketë një Samit, do të mbahet në Tiranë”, deklaroi kryeministri.

Kjo deklaratë përbën një ndryshim të dukshëm në raport me qëndrimin që Rama mbante vetëm katër muaj më parë, kur nga Ankaraja u përball me zërat për mundësinë e anulimit të organizimit të samitit në Shqipëri.

Në atë kohë, kryeministri shfaqej i bindur se asgjë nuk do ta ndryshonte vendimin për Tiranën si vend pritës, duke përdorur një gjuhë të prerë dhe duke e lidhur organizimin e aktivitetit me peshën e re që, sipas tij, Shqipëria kishte fituar në arenën ndërkombëtare.

“Ka ikur koha që bënin çfarë të donin me Shqipërinë. Sot Shqipëria bën atë që thotë dhe bën atë që thotë. Samiti i ardhshëm do të jetë në Shqipëri”, deklaronte Rama nga Ankaraja.

Por katër muaj më vonë, toni i kryeministrit është dukshëm më i rezervuar. Nga siguria se samiti do të organizohej në Shqipëri, Rama ka kaluar te një formulim që lë hapur edhe mundësinë e një tjetër shtyrjeje: “Në 2028, nëse do të ketë një Samit”.

Kontrasti mes dy deklaratave ngre pikëpyetje mbi pritshmëritë e krijuara nga qeveria për organizimin e një prej aktiviteteve më të rëndësishme ndërkombëtare në vend. Ajo që më parë paraqitej si një zhvillim i sigurt diplomatik, tashmë mbetet e lidhur me një vendimmarrje për të cilën, sipas vetë Ramës, nuk ka ende dakordësi.

Për momentin, Shqipëria vijon të përmendet si vendi i planifikuar për të pritur samitin e radhës, por data dhe zhvillimi i tij në Tiranë nuk janë ende të konfirmuara përfundimisht.