Ish-presidenti i FIFA-s, Sepp Blatter, ka lëshuar akuza të ashpra ndaj pasardhësit të tij, Gianni Infantino, duke e cilësuar atë si “diktator”.
Në një intervistë për gazetën gjermane “Der Spiegel”, Blatter ka kritikuar mënyrën se si Infantino po e drejton organizatën më të madhe të futbollit botëror.
Ai madje ka shkuar edhe më tej, duke deklaruar se presidenti aktual i FIFA-s duhet “të dërgohet në një spital psikiatrik”.
“FIFA aktualisht drejtohet nga dikush që është verbuar nga entuziazmi. Takimi me Donald Trump e ka ndryshuar Gianni Infantinon”, ka deklaruar Blatter.
“Ai beson se është i destinuar të monopolizojë sportin më të popullarizuar në botë. Por tani ka figura kryesore brenda FIFA-s që nuk e miratojnë këtë. Ata duan ta shkarkojnë”, ka shtuar ish-presidenti.
Blatter, i cili për vite të tëra ishte në krye të FIFA-s, beson se organizata po kalon një periudhë të vështirë nën drejtimin e Infantinos.
Deklaratat e tij pritet të nxisin reagime të shumta në botën e futbollit.