Stuhia subtropikale Charles ka përfshirë Spanjën dhe Portugalinë, duke sjellë reshje të dendura shiu, erëra të forta dhe përmbytje në disa zona të Gadishullit Iberik.

Në Spanjë, autoritetet vijuan evakuimin e më shumë se 3 mijë banorëve në zonën e Piedralaves, në provincën e Ávila-s, për shkak të rrezikut të tejmbushjes së një dige lokale.

Ndërkohë, në rajonin e Andaluzisë perëndimore, stuhia solli reshje që kaluan 120 milimetra në disa zona, erëra me shpejtësi mbi 120 km/h dhe dallgë të larta.

Në provincat Huelva, Cadiz dhe Sevilla u raportuan përmbytje, pemë të rrëzuara dhe probleme në qarkullimin rrugor.

Moti i keq shkaktoi disa incidente në Marbella, Torremolinos dhe Estepona, ku u raportuan ambiente të përmbytura, ndërsa në Malaga, Torremolinos, Coín dhe Archidona u rrëzuan pemë, degë, palma dhe sinjalistika rrugore.

Ndërkohë, në Portugali, stuhia Charles shkaktoi probleme të konsiderueshme në transport dhe në aktivitetin e përditshëm. Më shumë se 200 fluturime u anuluan të mërkurën, ndërsa shkollat, qindra supermarkete dhe biznese u mbyllën si masë parandaluese.

Mbrojtja Civile regjistroi 538 incidente që nga mesnata, kryesisht për shkak të përmbytjeve, erërave të forta dhe detit të trazuar.

Qeveria portugeze vuri në gatishmëri shërbimet e emergjencës dhe njësitë ushtarake, ndërsa qytetarëve iu bë thirrje të shmangnin daljet e panevojshme.

Stuhia kishte goditur më herët edhe arkipelagun e Madeirës, ku u raportuan përmbytje dhe rrëzime pemësh. Shërbimet e emergjencës shpëtuan një person që ishte bllokuar nga uji në garazhin e banesës së tij.

/rtsh.al/