Edicioni i dytë i Forumit të Zgjerimit të BE-së do të zhvillohet më 15-16 nëntor në Bruksel, nën moton “Evropa e Gjerë – Evropa më e Fortë”. Organizatore është Komisionerja Evropiane për Zgjerim, Marta Kos. Ajo ka mbledhur një listë të gjerë pjesëmarrësish: nga udhëheqës politikë kombëtarë dhe rajonalë deri te përfaqësues të shoqërisë civile, sipërmarrës, artistë, zëra të rinjsh dhe ekspertë politikash nga shtetet anëtare të BE-së dhe nga vendet në zgjerim.
Forumi synon të trajtojë perspektivën e zgjerimit në kontekstin e sfidave të vazhdueshme gjeopolitike dhe ndryshimeve tektonike. Synimi është edhe një nxitje për veprim për të gjithë palët e interesuara, për të vazhduar kursin dhe për ta çuar procesin përpara, bëhet me dije në njoftimin e organizatorëve.
Në mesin e folësve dhe pjesëmarrësve të konfirmuar janë Presidentja e Komisionit Evropian Ursula von der Leyen, Presidenti i Këshillit Evropian Antonio Costa dhe Presidenti i Finlandës Alexander Stubb. Përfaqësimi politik rajonal përfshin krerë qeverish dhe zyrtarë të lartë nga vendet kandidate dhe partnere.
Mes tyre janë kryeministri i Shqipërisë Edi Rama, kryeministri malazez Milojko Spajiç, kryeministri i Maqedonisë së Veriut Hristijan Mickoski, presidentja e Moldavisë Maia Sandu dhe kryeministri ukrainas Sergii Koretskyi. Në listë figuron edhe një përfaqësues i Listës së Studentëve nga Serbia.
Përveç sesioneve plenare, në forum janë planifikuar panele me ministra të jashtëm dhe delegatë në nivel ministror nga shtete anëtare të BE-së, mes tyre Spanja, Lituania, Holanda dhe Irlanda. Këto panele do të përqendrohen në reformat institucionale, sigurinë dhe formën e ardhshme të Unionit.
Sipas organizatorëve, edicioni i këtij viti mbledh një gamë të larmishme pjesëmarrësish, nga nivelet më të larta politike deri te shoqëria civile dhe ekspertët. Kështu, zgjerimi i BE-së kthehet në një hapësirë dialogu për të ardhmen e procesit.