Një aksident automobilistik i rëndë tronditi Emiratet e Bashkuara Arabe, ku 14 persona humbën jetën dhe 30 të tjerë u plagosën pas një përplasjeje masive me 23 automjete në qytetin e Fujairah. Sipas Ministrisë së Brendshme, incidenti ndodhi pak para mesnatës në hyrje të emiratit lindor, në një moment kur trafiku ishte i ngadalësuar, raporton BBC.
Ngjarja u shkaktua kur drejtuesi i një kamioni humbi kontrollin e mjetit dhe goditi fillimisht një automjet tjetër; më pas kamioni u përmbys dhe goditi disa mjete të tjera që ndodheshin në rrugë. Përplasja përfshiu gjithsej 23 automjete, mes tyre pesë kamionë. Pas goditjes, kamioni mori flakë dhe zjarri u përhap shpejt edhe në automjetet e tjera, duke shkaktuar pasoja tragjike.
Policia e Fujairah njoftoi se 30 persona u plagosën dhe u transportuan në spital; rreth gjysma e tyre u liruan pasi morën ndihmën mjekësore, ndërsa të tjerët vazhdojnë të trajtohen. Autoritetet thanë se viktimat dhe të plagosurit përfaqësojnë disa kombësi, përfshirë atë emiratase, omane, indiane, braziliane, pakistaneze, jordaneze dhe egjiptiane.
Konsullata indiane në Emiratet e Bashkuara Arabe konfirmoi se mes viktimave ka shtetas indianë, shprehu ngushëllime për familjet e prekura dhe deklaroi se po bashkëpunon me autoritetet lokale për ofrimin e ndihmës. Për shkak të gjendjes së rëndë të disa trupave, autoritetet po përdorin analizat e ADN-së për identifikimin e viktimave.
Në vendngjarje mbërritën menjëherë forcat e policisë, ekipet mjekësore dhe shërbimet e mbrojtjes civile, të cilat ndërhynë për shuarjen e zjarrit, shpëtimin e të plagosurve dhe sigurimin e zonës. Hetimet për zbardhjen e shkaqeve të ngjarjes dhe rrethanave të sakta të aksidentit po vijojnë nën drejtim të autoriteteve përkatëse.