Në Kosovë sot është tregtuar një litër naftë rreth 1.79 euro, derisa këto ditë ka një rënie të ndjeshme në bursat ndërkombëtare.
Krahasuar me vendet e rajonit, Shqipëria ka çmimin më të lartë të naftës në krahasimin me Kosovën, Serbinë, Malin e Zi dhe Maqedoninë e Veriut, me rreth 2,32 euro për litër, transmeton KosovaPress.
Sipas të dhënave të publikuara për 12 nëntor, dallimi ndërmjet çmimit më të lartë dhe atij më të ulët në këto 5 shtete arrin në 78 centë për litër.
Në Shqipëri, Bordi i Transparencës ka përcaktuar çmimin maksimal të naftës në 210 lekë për litër, që, sipas kursit të këmbimit, është rreth 2,32 euro. Kjo paraqet një rritje prej 5 lekësh krahasuar me çmimin paraprak prej 205 lekësh.
Pas Shqipërisë renditet Serbia, ku çmimi maksimal i Eurodizelit është 236 dinarë, ose rreth 2,01 euro për litër, sipas vendimit të autoriteteve serbe që vlen nga 6 deri më 13 nëntor.
Në Mal të Zi, çmimi maksimal i naftës është 1,95 euro për litër. Ky çmim ka hyrë në fuqi më 10 nëntor, pas një uljeje prej 2 centësh.
Ndërkohë, në Kosovë, sipas të dhënave të raportuara nga tregu, një litër naftë kushton rreth 1,79 euro.
Maqedonia e Veriut ka çmimin më të ulët në këtë krahasim. Sipas vendimit të Komisionit Rregullator të Energjisë, çmimi maksimal i naftës është 94,50 denarë, ose rreth 1,54 euro për litër.
Kështu, nafta në Shqipëri kushton rreth 53 centë më shumë për litër sesa në Kosovë. Në krahasim me Serbinë, dallimi është 31 centë, ndërsa me Malin e Zi 37 centë.
Kosova, ndërkaq, ka çmim rreth 25 centë më të lartë se Maqedonia e Veriut, por 16 centë më të ulët se Mali i Zi dhe 22 centë më të ulët se Serbia.
Duhet theksuar se krahasimi bazohet në çmimet maksimale të përcaktuara nga autoritetet në Shqipëri, Serbi, Mal të Zi dhe Maqedoninë e Veriut, ndërsa për Kosovën është përdorur një çmim i raportuar nga tregu. Për këtë arsye, të dhënat nuk përfaqësojnë domosdoshmërisht çmimet reale në çdo pikë karburanti.
