Ndihmëssekretari amerikan i Shtetit për Çështjet Evropiane dhe Euroaziatike, Brendan Hanrahan, po qëndron në Beograd, njoftoi Ambasada e Shteteve të Bashkuara në Serbi. Sipas ambasadës, vizita synon diskutime përmbajtjesore me partnerët serbë për të ardhmen e vendit dhe prioritetet e përbashkëta.
Temë janë edhe mundësitë e reja për avancimin e mëtejshëm të marrëdhënieve mes Serbisë dhe Shteteve të Bashkuara të Amerikës. Institucioni diplomatik nuk sqaroi se me kë do të takohet Hanrahan gjatë qëndrimit në Beograd, shkruan Euronews Albania, raporton Shërbimi i Ballkanit i Radios Evropa e Lirë.
Përfaqësuesit e Listës Studentore – subjektit që i fitoi zgjedhjet parlamentare të 25 tetorit – njoftuan më herët se do të takohen me përfaqësues të Ambasadës amerikane dhe të Departamentit amerikan të Shtetit. Takime parashikohen edhe me përfaqësues të Ambasadës së Italisë. Tema të diskutimit thanë se do të jenë sundimi i ligjit dhe energjetika.
“Jemi të gatshëm të bisedojmë, të dëgjojmë mendime të ndryshme dhe të ndërtojmë partneritete, por vendimet për të ardhmen e Serbisë do t’i marrim në mënyrë të pavarur dhe me përgjegjësi, duke u udhëhequr vetëm nga interesat e qytetarëve të saj. Në marrëdhëniet ndërkombëtare duam partneritet, jo nënshtrim; duam bashkëpunim, jo bindje të verbër”, u tha në njoftimin e Lëvizjes Studentore. ## Hanrahan në Beograd në prag të ndërrimit të pushtetit Vizita e Hanrahanit zhvillohet në një moment të rëndësishëm politik për Serbinë, e cila po përgatitet për ndërrimin e pushtetit pas zgjedhjeve parlamentare të 25 tetorit.
Lista Studentore fitoi 140 nga 250 vendet në Kuvend, duke siguruar shumicën e nevojshme për formimin e Qeverisë. Lista e udhëhequr nga ish-presidenti Aleksandar Vuçiç mori 103 mandate. Rezultati i dha fund sundimit shumëvjeçar të Partisë së tij Përparimtare Serbe, e cila ishte në pushtet që nga viti 2012.
Fitorja e studentëve erdhi pas një vale protestash kundër korrupsionit dhe mungesës së llogaridhënies. Ndryshimi i pushtetit pritet të shënojë edhe një provë për politikën e jashtme të Serbisë. Gjatë udhëheqjes së Vuçiçit, ajo ka synuar të ruajë marrëdhëniet me Perëndimin, por pa hequr dorë nga lidhjet e ngushta me Rusinë dhe Kinën.
Shtetet e Bashkuara kanë mbështetur integrimin evropian të Serbisë dhe normalizimin e marrëdhënieve të saj me Kosovën. Marrëdhëniet mes Uashingtonit dhe Beogradit janë ndikuar, ndër vite, edhe nga mospajtimet për politikën rajonale dhe raportet e Serbisë me Moskën.