Kombëtarja shqiptare ka marrë një fitore me peshë ndaj Finlandës, duke triumfuar 2-0 në “Air Albania” dhe duke hedhur një hap vendimtar drejt rikthimit në Ligën B të Ligës së Kombeve. Një eurogol i Ernest Muçit dhe një realizim me kokë i Rey Manajt i dhanë kuqezinjve tri pikët, që i sigurojnë kreun e Grupit C1.
Shqipëria e nisi ndeshjen në kërkim të golit dhe rrezikoi që në minutën e parë, kur Laçi provoi pas pasimit të Pilos, por gjuajtja e tij përfundoi jashtë. Edhe Asllani pati tentativat e tij, ndërsa në minutën e 35-të erdhi momenti që ndryshoi takimin.
Ernest Muçi realizoi një gol spektakolar, duke goditur me të jashtmen nga krahu i djathtë dhe duke e dërguar topin në rrjetë. Një finalizim i jashtëzakonshëm që ngriti në këmbë tifozët në stadium.
Finlanda kërkoi të reagonte përpara pushimit dhe pati mundësi nga goditjet standarde. Rasti më i rrezikshëm erdhi në minutën e 42-të, kur Tenho goditi me kokë, por Etrit Berisha u përgjigj me një pritje vendimtare.
Në pjesën e dytë, kuqezinjtë goditën sërish shpejt. Në minutën e 50-të, Elseid Hysaj dërgoi një krosim të saktë nga e djathta dhe Rey Manaj, me kokë, dyfishoi avantazhin. Sulmuesi pati mundësi të shënonte edhe një tjetër gol katër minuta më vonë, por nuk arriti të gjente kuadratin.
Situata u bë edhe më e favorshme për Shqipërinë në minutën e 67-të, kur Finlanda mbeti me dhjetë lojtarë. Tenho u ndëshkua me karton të kuq pas një ndërhyrjeje të rëndë ndaj Muçit, i cili po nisej në kundërsulm.
Në minutat e fundit, skuadra e drejtuar nga Rolando Maran administroi epërsinë, ndërsa pati edhe raste për të thelluar rezultatin. Laçi provoi në minutën e 73-të, ndërsa Suhoinen rrezikoi për finlandezët në të 78-tën.
Me këtë triumf, Shqipëria shkon në kuotën e 12 pikëve pas katër ndeshjesh dhe siguron kreun e Grupit C1. Tashmë, kuqezinjtë do të përballen në transfertë me Bjellorusinë, në Hungari, ku një barazim do të mjaftonte për të siguruar objektivin e vendosur në këtë edicion dhe për të prerë biletën drejt Ligës B.
Shqipëri 2-0 Finlandë
Shënues: Muçi 35’, Manaj 50’