Largimi i Michael Carrick ka shkaktuar polemika te Manchester United. Pavarësisht se e mbyllën sezonin e kaluar në vendin e tretë në Premier League, ish-mesfushori është shkarkuar nga detyra pas një fillimi zhgënjyes të sezonit aktual.

Ky vendim ka sjellë një reagim të ashpër nga Rio Ferdinand, i cili u tregua veçanërisht kritik ndaj pronarëve dhe drejtuesve të klubit për mënyrën se si u njoftua largimi i tij. “Deklarata duket sikur është shkruar nga ChatGPT“, tha Rio Ferdinand.

Ish-mbrojtësi shprehu pakënaqësinë për mungesën e një deklarate personale nga drejtuesit e klubit: “Deklarata e Manchester United duket si punë e ChatGPT… Dua të dëgjoj një zë! Dua të shoh një fytyrë që lidhet me këtë situatë...”, tha ai.

Kritikat e Ferdinand u drejtuan ndaj Sir Jim Ratcliffe, Omar Berrada dhe Jason Wilcox, të cilët thuhet se e morën vendimin gjatë një takimi në jug të Francës, ndërsa familja Glazer mori pjesë nga Shtetet e Bashkuara. Carrick, i cili qëndroi në Manchester, u njoftua për vendimin në Carrington përpara se të publikohej deklarata zyrtare.

“Rrjedhjet e informacionit janë të tmerrshme. Carrick meritonte më shumë respekt. Duke parë se si u menaxhua, besoj se mund të ishte trajtuar shumë më mirë. Rrjedhjet e informacionit nga klubi janë të tmerrshme, nuk i bëjnë nder askujt“, tha Ferdinand.

Ish-mbrojtësi e mbylli duke kërkuar më shumë konsideratë për ish-shokun e tij të skuadrës: “Është e tmerrshme që kjo po ndodh publikisht në këtë mënyrë. Minimumi që mund të pritej është pak respekt.”