Një studim i publikuar së fundmi ka nxjerrë në dritë përmasa shqetësuese të ngacmimeve dhe abuzimeve seksuale në radhët e ushtrisë gjermane. Sipas rezultateve, më shumë se 60% e grave që shërbejnë në Bundeswehr kanë përjetuar të paktën një formë të sjelljes së papërshtatshme me natyrë seksuale gjatë karrierës së tyre ushtarake. Gjetjet kanë shkaktuar reagimin e ministrit gjerman të Mbrojtjes, Boris Pistorius, i cili i ka cilësuar shifrat të papranueshme dhe ka paralajmëruar masa më të ashpra për parandalimin dhe ndëshkimin e këtyre rasteve.
Studimi, i pari i kësaj përmase në forcat e armatosura gjermane, është realizuar nga Qendra për Historinë Ushtarake dhe Shkencat Sociale në Potsdam. Ai përfshin një gamë të gjerë sjelljesh, duke nisur nga komentet dhe gjestet me përmbajtje seksuale, deri te ngacmimet fizike dhe dhuna seksuale. Nga rreth 4 mijë gra që morën pjesë në anketim, pothuajse 40% deklaruan se kishin qenë objekt i komenteve sugjestive, shprehjeve të papërshtatshme apo sjelljeve me karakter seksual.
Një tjetër tregues shqetësues lidhet me përdorimin e teknologjisë. Rreth 15% e grave raportuan se ishin fotografuar pa miratimin e tyre, ndërsa në disa raste imazhet ishin manipuluar edhe përmes inteligjencës artificiale. Sipas të dhënave, pak më shumë se 8% e të anketuarave deklaruan se kishin përjetuar sulme fizike, ndërsa 2% thanë se kishin qenë viktima të dhunës seksuale.
Megjithatë, fenomeni nuk kufizohet vetëm te personeli femëror. Studimi tregon se rreth 19% e ushtarëve meshkuj kanë përjetuar gjithashtu sjellje të papërshtatshme me natyrë seksuale. Personat homoseksualë dhe ata jobinarë rezultojnë të jenë veçanërisht të ekspozuar ndaj këtyre incidenteve. Një nga problemet kryesore të evidentuara është mungesa e besimit te mekanizmat e denoncimit brenda ushtrisë. Afërsisht një në tre pjesëmarrës deklaroi se nuk i kishte raportuar ose nuk do t’i raportonte rastet e ngacmimit, për shkak të dyshimeve se drejtuesit ushtarakë do të merrnin masa konkrete.
Ministri Pistorius pranoi se kjo situatë përbën një problem serioz për institucionin dhe theksoi se çdo ushtarak duhet të ndihet i mbrojtur, pavarësisht gjinisë apo pozicionit që mban. Ai premtoi zbatimin e një politike të tolerancës zero ndaj ngacmimeve dhe abuzimeve seksuale, si dhe forcimin e procedurave për trajtimin e denoncimeve. Në kuadër të këtyre masave, Ministria e Mbrojtjes ka ngritur linjën telefonike HELP, përmes së cilës personeli ushtarak mund të kërkojë këshillim dhe mbështetje. Gjithashtu, viktimat do të marrin informacion më të plotë mbi ecurinë e hetimeve dhe masat disiplinore ndaj personave përgjegjës.
Pistorius njoftoi se studimi do të zhvillohet çdo vit, për të monitoruar situatën dhe për të vlerësuar efektivitetin e masave të ndërmarra. Ministri zbuloi gjithashtu se disa zyrtarë kishin sugjeruar mospublikimin e rezultateve, nga frika se ato mund të dëmtonin reputacionin e Bundeswehr-it. Megjithatë, ai këmbënguli që të dhënat të bëheshin publike, duke argumentuar se transparenca është e domosdoshme për zgjidhjen e problemit. Rezultatet e studimit publikohen në një periudhë kur Gjermania po ndërmerr një zgjerim të konsiderueshëm të kapaciteteve të saj ushtarake.
Objektivi i Berlinit është që deri në vitin 2035 forcat e armatosura të numërojnë 260 mijë ushtarë aktivë dhe 200 mijë rezervistë, ndërkohë që janë planifikuar investime miliardëshe për modernizimin e pajisjeve dhe forcimin e personelit. Sipas Pistorius, një tjetër element i rëndësishëm është rritja e përfaqësimit të grave në ushtri. Studimi ka treguar se në njësitë ku numri i grave është më i lartë, rastet e ngacmimeve raportohen më rrallë. Për realizimin e anketimit u kontaktuan rreth 45 mijë ushtarakë aktivë dhe ish-ushtarakë, prej të cilëve afërsisht 18% morën pjesë në studim. Gjetjet kanë rikthyer në qendër të debatit publik nevojën për ndryshime të thella në kulturën institucionale të ushtrisë gjermane, në një kohë kur vendi synon të tërheqë mijëra rekrutë të rinj në forcat e armatosura.
