‘Unë jam një copë m...’/ Shkëlqimi dhe rënia e vizionarit të gjigantit NVIDIA

Nga Hagen Meyer, BILD

Nga jashtë një vizionar i suksesshëm i teknologjisë dhe bashkëshort model, ndërsa në fshehtësi bënte një jetë të dyfishtë me të paktën dy lidhje jashtëmartesore.

Tani, ndërsa vepra e jetës së ish-drejtuesit të NVIDIA-s, Jensen Huang (63 vjeç), po i rrëshqet nga duart, duket se po i shuhet edhe energjia e tij e famshme deri më tani.

Persona që e kanë vëzhguar nga afër po japin detaje intime mbi gjendjen e tij emocionale, të figurës që deri tani ka qenë një nga personazhet më të spikatura në krye të kompanisë me vlerë triliona dollarë.

Pasi për javë të tëra kishte luftuar kundër akuzave për tradhti bashkëshortore dhe për të mbajtur postin e drejtuesit të NVIDIA-s, Huang u dorëzua të mërkurën në mbrëmje.

Personat e afërt me të vërejnë që atëherë një ndryshim të theksuar te ish-drejtuesi i gjigantit të çipave të inteligjencës artificiale, i cili më parë ishte gjithmonë i motivuar, i përkushtuar ndaj detajeve dhe plot energji.

Shqetësimi më i madh i Huang është bashkëshortja e tij

Sipas bashkëbiseduesve të cituar nga agjencia e lajmeve Bloomberg, gjendja e tij luhatet nga një qëndrim sfidues i tipit “nuk më intereson” deri te vetëfajësimi dhe pendesa.

“Unë jam një copë m...”, thuhet se ka deklaruar Huang.

Sipas këtyre burimeve, shqetësimi i tij më i madh është bashkëshortja dhe jo gratë me të cilat opinioni publik tashmë e lidh në mënyrë romantike.

Madje, duket se nuk i intereson as marrja e mundshme në pyetje nga Kongresi amerikan, ku politikanët synojnë ta pyesin me imtësi për marrëdhënien e tij me Alice Huang, e dyshuar si spiune e Kinës (e cila nuk ka lidhje familjare me Jensen Huang).

Sipas personave që kanë biseduar me të, gjatë ditëve të fundit Huang ka deklaruar se tashmë nuk i intereson se çfarë do të ndodhë me të.

Papritur, Huang filloi t'u përgjigjej më ngadalë emaileve

Që kur Huang ishte ende në krye të kompanisë, punonjësit e rrethit të tij më të ngushtë drejtues kishin vënë re se, për shembull, koha që ai i kushtonte përgjigjes së emaileve ishte zgjatur.

Më parë ai përgjigjej menjëherë, “pavarësisht orës së ditës apo natës”, raporton Bloomberg.

Huang është i martuar prej më shumë se 40 vitesh. Ai dhe bashkëshortja e tij, Lori, janë njohur gjatë studimeve universitare, ku kanë qenë të dashuruar që në kolegj.

Çifti u martua në vitin 1985, tetë vite përpara se Huang të themelonte NVIDIA-n.

Të shtunën e kaluar, miliarderi i teknologjisë pranoi tradhtinë bashkëshortore.

Ai deklaroi se kishte lënduar bashkëshorten dhe fëmijët e tij: “Nuk ka asnjë justifikim për atë që kam bërë”.

Ndërkohë, Huang akuzohet gjithashtu për një lidhje jashtëmartesore me drejtuesen e NVIDIA-s, Kimberly Powell (48 vjeçe).

Sipas informacioneve të agjencisë së lajmeve Reuters, ai dyshohet se ka pasur gjithashtu një marrëdhënie intime me një tjetër punonjëse të kompanisë.