Një investigim i Corriere della Sera zbardh aktivitetin e rrjeteve kriminale shqiptare në trafikun ndërkombëtar të kokainës, duke ndjekur gjurmët nga Maqedonia e Veriut dhe Italia deri në Dubai. Në fokus janë persona të akuzuar për trafik droge, organizatë kriminale dhe pastrim parash, të cilët, sipas medias italiane, kanë lidhje me grupe kriminale në Belgjikë, Britani të Madhe dhe Itali. Dubai përmendet si destinacion ku disa prej tyre kanë qëndruar për një kohë të gjatë.
Artikulli thekson klanin e Sarajit në periferi të Shkupit si një qendër të traditës kriminale që i mbijeton goditjeve dhe arrestimeve. Si shembull për ndikimin e krimit të organizuar flitet edhe deklarata e Xhelal Nezirit, drejtues i Institutit Ballkanik për Median dhe Demokracinë në Tetovë: “Çdo shtet e ka mafien e vet, por tek ne shpesh krijohet përshtypja se është mafia ajo që ka një shtet”.
Figura kryesore të nxjerra në pah janë Sheval Muaremi, i dënuar me urdhërarreste për vrasje, organizatë kriminale dhe trafikim të mëdha sasi kokainë, i cili prej dy vitesh jeton në Dubai dhe, sipas shkrimit, menaxhon nga atje biznese fitimprurëse; Eneo Carka, 44 vjeç, i njohur si “Napoleoni”, i dyshuar për transport të sasive të mëdha droge drejt Belgjikës, Britanisë së Madhe dhe Ligurias (La Spezia), i cili komunikon përmes teknologjive të sofistikuara dhe ka një bazë në lagjen Gallaratese të Milanos; dhe Denis Matoshi, 37 vjeç, i cili u ekstradua në Belgjikë vetëm së fundmi pas qëndrimit në Emirate.
Investigimi sjell detaje mbi lidhjet e dyshuara mes trafikantëve shqiptarë dhe ’Ndranghetës italiane, rolin e rrjeteve ndërkombëtare në furnizim dhe shpërndarje të kokainës, dhe tensionet midis klaneve shqiptare dhe strukturave të vjetra mafioze italiane. Për Carkën raportohen kontakte të pretenduara me figurat kryesore të trafikut ndërkombëtar të drogave.
Artikulli përmend gjithashtu Suadën, ish-bashkëshorten e Matoshit dhe ish-Miss Shqipërinë, e cila vazhdon të jetojë në Dubai dhe, sipas autoriteteve belge, zotëron pasuri të paluajtshme në Emirate me vlerë rreth 17 milionë euro; mediat italiane raportojnë se ajo organizon festa luksoze atje me partnerin e ri.