Një ditë para ndeshjes mes Kombëtares së Kosovës dhe asaj të Izraelit në futboll, në kuadër të Ligës së Kombeve, janë shtuar masat e sigurisë përreth stadiumit “Fadil Vokrri” në Prishtinë.
Të gjitha rrugët që shpien drejt stadiumit të kryeqytetit janë bllokuar nga Policia për qarkullimin e automjeteve, ndërsa në disa pjesë janë vendosur edhe shirita sigurie me qëllim të ruajtjes së rendit dhe qetësisë.
Kosova dhe Izraeli ballafaqohen të shtunën në orën 15:00 në stadiumin “Fadil Vokrri” në Prishtinë.
Kosova është e dyta në Grupin B3 me pesë pikë. Pesë pikë i ka edhe Irlanda, e cila renditet në vendin e tretë.
Synimi i Kosovës është qëndrimi në Ligën B edhe për edicionin e ardhshëm.
Në dhjetor, Kosova do t’i mësojë kundërshtarët e kualifikimeve për Kampionatin Evropian 2028. Kualifikimet nisin në mars të vitit të ardhshëm.
Kosova dhe Izraeli janë përballur tri herë në të kaluarën. Dy ndeshje kanë përfunduar baras, ndërsa ndeshjen e 12 nëntorit 2023, të zhvilluar në Prishtinë, e kishte fituar Kosova me rezultat 1:0.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
