Shpërthen makina në Moskë, plagoset ish-ndihmësi i kryeministrit pro-rus të Ukrainës

Një shpërthim me bombë në një automjet në Moskë ka lënë të plagosur Sergei Zavorotniy, ish-ndihmës i një prej ish-kryeministrave pro-rusë të Ukrainës, Mykola Azarov. Ngjarja ndodhi të premten në lagjen Chertanovo të kryeqytetit rus, ndërsa ky është incidenti i dytë i këtij lloji në Rusi brenda dy ditësh.

Sipas deklaratës së hetuesve rusë, Zavorotniy ndodhej në automjet në momentin kur ai shpërtheu. Ai u transportua në spital për të marrë ndihmë mjekësore.

Mediat ruse Ren TV dhe kanali 112 në Telegram raportuan se Zavorotniy kishte humbur krahun e majtë si pasojë e shpërthimit, ndërsa kishte pësuar edhe tronditje, fraktura të brinjëve dhe dëmtime të tjera.

Komiteti Hetues i Rusisë ka nisur hetimet për zbardhjen e rrethanave të ngjarjes. Ndërkohë, deri më tani nuk ka pasur një reagim nga autoritetet ukrainase.

Mykola Azarov, ish-shefi i Zavorotniy, drejtoi qeverinë ukrainase nga viti 2010 deri në vitin 2014. Ai u largua drejt Rusisë pas protestave të njohura si Revolucioni Maidan, të cilat çuan në rrëzimin e presidentit pro-rus Viktor Yanukovych.

Azarov deklaroi për agjencinë shtetërore ruse të lajmeve TASS se nuk kishte informacion për shpërthimin, përveç faktit që ish-ndihmësi i tij kishte mbijetuar.

Zavorotniy u bë ndihmësi kryesor i Azarov pas një karriere si korrespondent i huaj në Amerikën Latine gjatë periudhës sovjetike. Pas zhvendosjes në Rusi në vitin 2014, ai punoi si komentator politik, duke publikuar artikuj kritikë ndaj strukturave të sigurisë ukrainase.

Shpërthimi në Moskë vjen një ditë pas një tjetër incidenti të ngjashëm në Rusi. Të enjten, një ushtarak rus u vra nga shpërthimi i një makine-bombë në Shën Petersburg.

Rusia ka akuzuar më parë Ukrainën për përfshirje në vrasje të zyrtarëve të lartë ushtarakë dhe personave të lidhur me Moskën. Në disa raste, burime ukrainase kanë marrë përgjegjësinë për sulme të tilla, ndërsa në raste të tjera Kievi ka mohuar përfshirjen.