Tirana është skuadra që ka grumbulluar më shumë pikë gjatë vitit kalendarik 2026 në Kategorinë Superiore. Bardheblutë kanë regjistruar një ecuri pozitive, duke marrë kryesimin me 49 pikë, pas 29 ndeshjesh të zhvilluara. Një bilanc që i vendos në krye të këtij klasifikimi, por pa krijuar një shkëputje të konsiderueshme nga ndjekësit.

Në vendin e dytë renditet Egnatia me 47 pikë. Kampionët kanë vetëm dy pikë më pak se kryeqytetasit dhe mbeten skuadra më e afërt në këtë garë statistikore. Rrogozhinasit kanë regjistruar 14 fitore, pesë barazime dhe 10 humbje, ndërsa kanë shënuar 44 gola dhe kanë pësuar 33. Me këtë bilanc, Egnatia ka sulmin më produktiv mes katër skuadrave të para, duke konfirmuar se edhe përgjatë vitit 2026 ka qenë një nga ekipet më të qëndrueshme të kampionatit. Podiumi plotësohet nga Vllaznia.

Shkodranët kanë grumbulluar 45 pikë, katër më pak se Tirana dhe dy pas Egnatias. Me 13 fitore, gjashtë barazime dhe 10 humbje, skuadra kuqeblu ka arritur të pozicionohet mes tri ekipeve më të mira të vitit. Vllaznia ka shënuar 30 gola dhe ka pësuar 27, duke pasur një bilanc pozitiv prej tri golash.

Menjëherë pas shkodranëve vjen Elbasani, me 43 pikë. Verdheblutë kanë regjistruar 11 fitore, 10 barazime dhe tetë humbje. Ajo që bie në sy në statistikat e tyre është numri i lartë i ndeshjeve të mbyllura në barazim, më i madhi mes katër skuadrave të para. Elbasani ka vetëm gjashtë pikë më pak se Tirana dhe është një tjetër emër që ka lënë gjurmë në renditjen e vitit 2026.

Në vendin e pestë pozicionohet Teuta me 37 pikë. Durrsakët kanë marrë 10 fitore dhe shtatë barazime, ndërsa kanë pësuar 12 humbje. Bilanci i tyre është 31 gola të shënuar dhe 29 të pësuar.

Fundi i dy të mëdhave

Pas tyre vjen Vora me 35 pikë, po aq sa Partizani, por me një bilanc të ndryshëm rezultatesh. Vora ka regjistruar tetë fitore, 11 barazime dhe 10 humbje, ndërsa Partizani ka marrë 10 fitore, pesë barazime dhe 14 humbje. Të kuqtë kanë shënuar 35 gola, por kanë pësuar 47, duke pasur një diferencë negative prej 12 golash.

Një tregues që pasqyron vështirësitë e skuadrës kryeqytetase për të ruajtur vazhdimësinë në rezultate. Pas Partizanit renditet Dinamo me 34 pikë. Blutë kanë regjistruar tetë fitore, 10 barazime dhe 11 humbje, me 31 gola të shënuar dhe 35 të pësuar. Për një skuadër me pretendime të larta, ky bilanc përfaqëson një ecuri larg objektivave të pritshme. Dinamo ka mbetur prapa rivalëve kryesorë dhe nuk ka arritur të jetë pjesë e grupit që kryeson renditjen e vitit.

Dueli i vitit për kryesimin Statistikat e vitit kalendarik 2026 nxjerrin në pah rivalitetin mes Tiranës dhe Egnatias. Dy skuadrat kanë regjistruar nga 14 fitore, por bardheblutë kanë arritur të grumbullojnë dy pikë më shumë. Nga ana tjetër, rrogozhinasit kanë qenë më produktivë në fazën sulmuese, me 44 gola të shënuar kundrejt 37 të Tiranës.

Pas tyre vjen Vllaznia, e cila me 45 pikë ka arritur të ngjitet në podium, duke lënë pas Elbasanin me dy pikë diferencë. Këto katër skuadra përbëjnë grupin më të suksesshëm të klasifikimit dhe janë ato që kanë krijuar diferencën në raport me pjesën tjetër të ekipeve. Në krahun tjetër, Partizani dhe Dinamo janë larg pozicioneve të para.

Të kuqtë kanë 35 pikë, ndërsa blutë 34, duke mos arritur të shoqërojnë rivalët tradicionalë në krye të renditjes. Në përfundim, Tirana është skuadra që mbyll pjesën e pasqyruar të vitit 2026 në krye të klasifikimit, por Egnatia mbetet shumë pranë. Vllaznia dhe Elbasani plotësojnë katërshen më të mirë, ndërsa diferencat mes ekipeve tregojnë se viti ka sjellë ecuri të ndryshme për klubet e Superiores.