Lamine Yamal është bashkuar mesditën e sotme me grumbullimin e kombëtares së Spanjës, në prag të ndeshjes së Nations League kundër Anglisë, që do të zhvillohet të dielën në orën 20:45 në stadiumin “Metropolitano” të Madridit. Përveç tij, në grumbullim rikthehet edhe Mikel Oyarzabal i Real Sociedad; të dy pritet të zhvillojnë pasditen seancën stërvitore me pjesën tjetër të skuadrës.
Rikthimin e Yamalit e konfirmoi trajneri Luis de la Fuente pas fitores 2-0 ndaj Republikës Çeke në Pragë. Sipas stafit mjekësor, gjendja e sulmuesit nuk konsiderohej serioze, por ishte evidentuar prania e lëngjeve në artikulacionin e gjurit të djathtë pas një goditjeje të fortë. De la Fuente deklaroi se futbollisti tashmë është në gjendje të mirë fizike dhe mund të luajë 90 minuta.
Gjatë ditëve të fundit, 19-vjeçari qëndroi në Barcelonë, ku vijoi trajtimin dhe rikuperimin në ambientet e klubit, me miratimin e trajnerit të kombëtares dhe në koordinim të plotë mes stafit mjekësor të Spanjës dhe atij të Barcelonës. Gjatë qëndrimit në klub, ai trajtohej nga fizioterapistët në qendrën stërvitore “Ciutat Esportiva Joan Gamper”, me synimin për t’u bërë plotësisht i gatshëm për ndeshjen ndaj Anglisë.
Vendimi për të lejuar që Yamal të qëndronte në Barcelonë për trajtim shkaktoi kritika, me pretendime se ai po përfitonte trajtim të privilegjuar krahasuar me lojtarët e tjerë të kombëtares. Përballë këtyre akuzave, De la Fuente reagoi ashpër, sqaroi se vendimi ishte marrë vetëm për arsye mjekësore dhe se stafi mjekësor, së bashku me atë të klubit, e kishte vlerësuar situatën. Ai theksoi se Yamal nuk ka asnjë privilegj të veçantë dhe se e njëjta procedurë do të ndiqej për çdo futbollist tjetër në një situatë të ngjashme.
Prania e Yamalit konsiderohet e rëndësishme për Spanjën, e cila synon të sigurojë vendin e parë në grup dhe avantazhin e fushës në çerekfinalet e Nations League; për kombëtaren spanjolle, një barazim në ndeshjen e së dielës në Madrid do të mjaftonte për të arritur këtë objektiv.