Autoritetet e aviacionit kanë urdhëruar pezullimin e fluturimeve drejt Shteteve të Bashkuara në të gjithë vendin, pas një problemi komunikimi që ka prekur qendrat e kontrollit të trafikut ajror. Administrata Federale e Aviacionit (FAA) njoftoi se vendimi është marrë për arsye sigurie dhe për shkak të rrethanave të jashtëzakonshme.
Sekretari amerikan i Transportit, Sean Duffy, deklaroi se problemi lidhet me sistemet e komunikimit të qendrave të kontrollit të trafikut ajror në të gjithë vendin. Teknikët e FAA-së kanë nisur hetimet për të identifikuar shkakun e defektit, ndërsa autoritetet kanë premtuar përditësime të vazhdueshme mbi situatën dhe po punojnë për rikthimin e funksionimit normal të kontrollit të trafikut ajror.
Sipas platformës së gjurmimit të fluturimeve Flightradar24, rreth 3,100 avionë ndodheshin në ajër në atë moment me destinacion aeroportet amerikane. Platforma bëri të ditur gjithashtu se në atë kohë nuk po ngriheshin avionë të tjerë drejt SHBA-së. FAA njoftoi se për fluturimet ndërkombëtare që janë aktualisht drejt SHBA-së do të merren vendime rast pas rasti.
Ende nuk dihet se sa fluturime janë prekur nga ky vendim dhe sa do të zgjasë pezullimi; autoritetet nuk kanë dhënë një afat të përcaktuar. Situata mbetet në zhvillim ndërsa zyrtarët e aviacionit po përpiqen të përcaktojnë shkakun e defektit dhe të rikthejnë shërbimet e komunikimit dhe kontrollit të trafikut ajror në funksion normal. Top Channel.