Këngëtarja italiane Laura Pausini ka fituar çmimin e pestë “Latin Grammy” në karrierën e saj, këtë herë në kategorinë “Albumi më i mirë tradicional pop” për albumin “Yo Canto 2”.
Çmimi iu dorëzua gjatë edicionit të 27-të të ceremonisë “Latin Grammy Awards”, të mbajtur në arenën “MGM Grand Garden Arena” në Las Vegas.
Ky është trofeu i pestë “Latin Grammy” për artistën italiane dhe vlerësimi i gjashtë madhor nga Akademia Latine e Regjistrimeve. Në vitin 2023, Pausini u shpall “Personazhi i Vitit”, duke u bërë artistja e parë që nuk e kishte spanjishten gjuhë amtare që merrte këtë titull prestigjioz.
Albumi “Yo Canto 2”, që i siguroi fitoren e këtij viti, është një homazh për muzikën në gjuhën spanjolle. Përmes këtij projekti, këngëtarja ka sjellë interpretime të disa prej këngëve më të njohura dhe veprave të kantautorëve që kanë lënë gjurmë në muzikën latine.
E emocionuar për këtë vlerësim, Pausini shprehu lumturinë dhe mirënjohjen e saj, duke nënvizuar se albumi përfaqëson një dedikim ndaj muzikës latine dhe artistëve që e kanë frymëzuar përgjatë karrierës. Ajo ua kushtoi çmimin autorëve dhe interpretuesve që kanë kontribuar në zhvillimin dhe përhapjen e kësaj muzike në mbarë botën.
Suksesi në “Latin Grammy” vjen në një moment të rëndësishëm për karrierën e saj, teksa turneu botëror “Io Canto / Yo Canto World Tour 2026/2027” ka shitur më shumë se 500 mijë bileta në vende të ndryshme të botës.
Turneu do të vijojë gjatë vitit 2027 me koncerte në Amerikën Latine dhe Shtetet e Bashkuara, ndërsa Pausini do të rikthehet edhe në Itali, ku ka planifikuar një seri performancash në stadiume, në qytete si Lignano Sabbiadoro, Messina, Bari, Pescara dhe Romë.
Në vjeshtë, artistja do të vijojë koncertet në disa qytete evropiane, mes tyre Londra, Lioni, Parisi, Goteborgu, Amsterdami, Zagrebi dhe Milano.