“Mrekulli në Misisip”, shpëtohen të gjithë pasagjerët pas përplasjes së anijes turistike në New Orleans
Rreth 130 persona janë shpëtuar pasi një anije turistike u përplas me një anije mallrash në lumin Misisipi, pranë qytetit të New Orleans në SHBA.
Anija turistike “American Heritage” u godit nga anija transportuese “Atlantic Asphalt”.
Si pasojë e përplasjes, 32 persona u transportuan në spital me lëndime jo të rënda. Autoritetet konfirmuan se nuk ka asnjë person të zhdukur, duke e cilësuar operacionin e shpëtimit si një “mrekulli në Misisip”.
Shkaku i saktë i aksidentit mbetet ende nën hetim. Kapitenia e Rojës Bregdetare amerikane, Melanie Burnham, deklaroi se dyshimet e para lidhen me një problem në sistemin e drejtimit të anijes.
Pas përplasjes, ndërsa anija nisi të merrte ujë dhe të anohej, pasagjerët filluan të evakuoheshin. Më pas, mjeti lundrues përfundoi i kthyer në njërën anë.
Operatorët e rimorkiatorëve, policia dhe ekipet e tjera të shpëtimit mbërritën me shpejtësi në vendngjarje. Ndërkohë, autoritetet urdhëruan mbylljen e përkohshme të lumit Misisipi për të lehtësuar operacionin e kërkim-shpëtimit.
Presidenti amerikan Donald Trump reagoi përmes një postimi në platformën Truth Social, ku e cilësoi operacionin e shpëtimit si një “punë të jashtëzakonshme”.
