Shtyrja e shkuarjes në tualet është një zakon i shpeshtë, veçanërisht gjatë punës apo udhëtimeve, por ekspertët paralajmërojnë se mbajtja e shpeshtë e urinës mund të ketë pasoja për shëndetin e fshikëzës dhe veshkave.
Sipas doktor Jason Kim, profesor i urologjisë në Universitetin Stony Brook në New York, mbajtja e urinës herë pas here zakonisht nuk përbën rrezik, por kur kjo kthehet në zakon, mund të shkaktojë probleme shëndetësore, raporton CNN.
Një fshikëz e shëndetshme mund të mbajë rreth 400 deri në 600 mililitra urinë. Kur ajo mbushet pjesërisht, receptorët nervorë dërgojnë sinjale në tru për të treguar nevojën për urinim.
Një nga rreziqet që lidhet me mbajtjen e shpeshtë të urinës është infeksioni i traktit urinar. Urologu Jamin Brahmbhatt shpjegon se zbrazja e fshikëzës ndihmon në largimin e baktereve, ndërsa qëndrimi i zgjatur i urinës mund të favorizojë shumimin e tyre.
Me kalimin e kohës, mbajtja e vazhdueshme e urinës mund të dobësojë muskujt e fshikëzës, duke e vështirësuar zbrazjen e plotë të saj. Në raste më të rënda, kjo mund të çojë në infeksione të veshkave, grumbullim të urinës dhe dëmtime të tyre.
Ekspertët theksojnë se, me konsum normal të lëngjeve, fshikëza zakonisht duhet të zbrazet çdo tre deri në katër orë gjatë kohës kur jemi zgjuar.
Kujdes i veçantë rekomandohet për të moshuarit, gratë shtatzëna dhe personat me probleme të fshikëzës apo veshkave, të cilët mund të jenë më të ndjeshëm ndaj komplikimeve.
Nëse shfaqen vështirësi gjatë urinimit ose nevoja për të shkuar jashtëzakonisht shpesh në tualet, ekspertët këshillojnë konsultimin me mjekun, pasi këto simptoma mund të lidhen me infeksione ose probleme të tjera shëndetësore. /Telegrafi/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
