Garda Revolucionare e Iranit njofton se ka sulmuar me dronë një bazë ushtarake amerikane në Bahrein

Garda Revolucionare e Iranit njoftoi sot se kanë shënjestruar me dronë një bazë ushtarake amerikane në Bahrein, në shenjë kundërpërgjigjeje ndaj veprimeve «armiqësore» të SHBA-së.

«Sistemi amerikan i radarëve të mbrojtjes kundërajrore në bazën e helikopterëve Al Rifa në Bahrein u shënjestrua me gjashtë dronë, të cilët i përkasin Forcave Ajrore dhe Hapësinore të Gardës Revolucionare», thuhet në një postim të trupave elitare të ushtrisë iraniane në Telegram.

Pak më herët, autoritetet e Bahreinit publikuan në rrjetin social X dy paralajmërime të veçanta për kërcënime të mundshme. Kjo ndodhi për herë të parë që nga muaji shtator.

Ministria e Brendshme e Bahreinit u bëri thirrje qytetarëve dhe banorëve të vendit të ruajnë qetësinë dhe të drejtohen drejt vendstrehimit më të afërt të sigurt, pa dhënë sqarime të tjera për natyrën e kërcënimit.

Ky sulm ndodhi dy ditë pasi Rojet e Revolucionit njoftuan se kishin goditur një radar amerikan të paralajmërimit të hershëm në Bahrein. Ushtria amerikane e mohoi këtë pretendim, duke deklaruar se kishte interceptuar dy dronë iranianë, të cilët nuk shkaktuan dëme.

Në Bahrein është e dislokuar Flota e Pestë e Marinës Ushtarake të Shteteve të Bashkuara.