Në Budapest të Hungarisë, Shqipëria do të përballet në fushë me Bjellorusinë në UEFA Nations League. Për kuqezinjtë, kjo do të jetë ndeshja e fundit e fazës së grupeve në Ligën e Kombeve, një përballje e rëndësishme për të mbyllur aventurën në Grupin C1.
Ndeshja në stadiumin “Illovszky Rudolf” do të zhvillohet me dyer të mbyllura. Tifozët shqiptarë nuk do të kenë mundësinë për të mbështetur nga afër kuqezinjtë për shkak të sanksioneve që UEFA i ka vendosur Bjellorusisë, ku parashikohet që kombëtarja dhe klubet e këtij vendi t’i zhvillojnë ndeshjet si pritëse në terrene neutrale dhe pa spektatorë.
Ky vendim i Komitetit Ekzekutiv të UEFA-s, i marrë më 3 mars 2022, vijon të jetë në fuqi dhe zbatohet edhe për sfidën ndaj Shqipërisë.
Shqipëria vjen si kryesuese e grupit C1 në Ligën e Kombeve, me 12 pikë. Bjellorusia ndjek në vendin e dytë me 10 pikë. Kuqezinjve iu mjafton një barazim për të siguruar vendin e parë dhe ngjitjen në Ligën B.
Bjellorusi – Shqipëri do të luhet pasditen e kësaj të diele, nga ora 18:00.
